Aizawla cham mek Minister of State for Minority Affairs John Barla chu Thawhtanni tlai khan Central YMA office-ah lengin CYMA hruaitute a kawm. Union MoS hi Mizoram BJP president Vanlalhmuaka leh a thawhpuiten tawiawmin, CYMA hian president R
Lalngheta hoin an lo dawngsawng a ni.
Union MoS chuan Central YMA hruaitute hnenah YMA-in Mizoram leh hnam tana a thawh chu ropui tiin a ngaihlu tih a hrilh a. Hnam hnuaihnung zawk leh tlem zawkte tana theihtawp chhuah zel turin a ngen.
Sawrkar laipuiin hnam tê leh tlem zawkte tana ruahmanna a siam zawng zawng sawi vek sen a nih loh thu leh heng hamthatna hi Mizoram tana luanluh tir a duh thu a sawi a. Scheme hrang hrang guidelines ziahlanna chu CYMA hruaitute hnenah a hlan a ni.
Central YMA hruaitute hnenah hian Aizawl khawpui atanga thingtlang leh hmun kilkhawr zawka ruang an phurh zung zung theih nan, Morgue Van tha tak pek a tum thu John Barla hian a sawi a ni.
Union MoS-in CYMA kawm
