Union MoS-in Saitual a tlawh
Union minister of state for Road Transport & Highways leh Corporate Affairs Harsh Malhotra chuan Ningani khan Saitual district a tlawh a. Sawrkar department hotute, village council leh tlawmngai pawl hruaitute a kawm bakah Saitual District Hospital, Govt. High School leh Tamdil a tlawh.
Saitual district bawrhsap Dr Lalngura Tlau kaihhruaia inkawmnaah Union minister of state chuan sawrkar laipui atanga Saitual district tlawh hmasa bertu a ni chu lawmawm a tih thu a sawi a. Sawrkar laipui ruahmanna hrang hrang, a bikin, MGNREGA, PMAY, Jal Jeevan Mission leh Mid-day Meal chu Saitual district-ah tha taka kalpui a ni chu lawmawm a tih thu a sawi. An mamawhte ziaka thlen turin a chah a, a theih anga hma laksak a tum thu a sawi a ni.
Inkawmnaah hian Saitual district-a sawrkar office hotute, VC leh NGO hruaitute an tel a. Bwrhsap pisa, District Rural Development Office, Public Works Department, Public Health Engineering Department leh District Education Office hotuten an department chungchang, hma an lakna leh central scheme an kalpui dan chu powerpoint presentation hmangin an sawifiah a ni.
Hemi hnu hian Harsh Malhotra hian Saitual District Hospital a tlawh a. OPD leh ward fangin, hospital mamawh enfiah a, senior medical officer Dr Zothanpari Chhakchhuak hoin an lo dawngsawng a ni. Saitual Govt. High School tlawhin, Netaji Subhash Chandra Bose Avasiya Vidyalaya (NSCBAV) hostel, Vocational Educational building leh science laboratory a fang a. District education officer Micky R Lalenkawla, DEO chuan a lo dawngsawng. Tamdil a tlawhnaah DFDO Zomuansangi’n lo dawngsawngin sawrkar laipui scheme hnuaia Fisheries department hnathawh hrang hrang leh an ruahmanna an sawiho a ni.
Union minister of state hi nizan khan Aizawlah a riak a, vawiin hian Delhi a pan ang.
Union MoS-in Saitual a tlawh
