Union MoS-in Saitual tlawh
Damdawi in hmunhma a enpui
Zan khat riaka Mizoram tlawhtu Union minister of state for Youth Affairs & Sports Raksha Nikhil Khadse chuan Nilaini khan Saitual a tlawh a, a tlawh tel tur Kolasib erawh remchan lohna avangin a hmunah a kal thei loa, inbiak hmuh theihna hmangin district thuneitute nen an inkawm.
Union MoS hian Thawhlehni khan Mizoram a thleng a. Aizawla sports hmunhma thenkhat a tlawh bakah a kaihhnawih sawrkar hotute leh sports association hruaitute a kawm. Hemi hnu hian Saitualah a riak chho a ni.
Thawhlehni zan hian Saitual district-a sawrkar deparment hotute leh sports association hruaitute nen an inkawm a. Central scheme hrang hrang mipuiin an hlawkpui lehzual theihnan chak zawka hma la turin a chah. Mizoram chu organic farming-ah a san avangin mumal taka thlai leh thei thar chu sawngbawl a nih chuan ram dangah hlep tam zawka thawnchhuah theih a nih a beisei thu a sawi.
Mizoram Sports minister nen an inkawm thu sawiin, naupangten school an kal laia an theihna hai chhuah a nih theihnan infiamna ruhrel tihhmasawn a tul tih Raksha Nikhil Khadse hian a sawi a. Ruihhlo tawlhrukna kawng a nih avanga Mizoram buaina a vei tih sawiin, thalaiten ruihhlo lama harsatna an tawh lohnan sawrkar program ‘Mera Yuva Bharat’ kaltlangin ruihhlo do kawngah ke pen se a duh tih a sawi a ni.
State leh district an tlawhnaah review meeting minutes hi Prime Minister Office a thlen thin avangin sawrkar official-ten ngaipawimawh a, data lakkhawm leh meeting inpuahchah kawngah tan la thar turin a chah bawk.
Union MoS hian Saitual District Hospital tlawhin, hospital dinhmun leh hmalak mek a enfiah a. Khum 50 awm theihna District Hospital Complex sak meka an hnathawh enin, hna hmabak a la tam a, hun tiam chhunga zawh a nih theihnan tan la turin thuneitute a chah.
OPD building thar sak a en hnu ah District Hospital hman mek a tlawh a, Hospital staff-te pawhin an mamawh leh an harsatna an lo thlen a ni.
Inbiak hmuh theihna hmanga Kolasib district thuneitute leh sawrkar hotute nen an inkawmnaah department hrang hrang hmalakna leh hnathawh dan powerpoint presentation hmangin an sawifiah a. Union minister of state-in zawhna a neihte an chhang nghal zel a ni.
Agriculture leh horticulture lamah Kolasib district-in a ti tha chu fakawm a tih thu a sawi a. An district-a thalai zingah infiamna lama chak zawka hma lak a nih theihnan MY Bharat Kolasib nen tangduna hmalak a tul thu leh hma lak theih dan tur a sawi bawk.
Union MoS-in Saitual tlawh Damdawi in hmunhma a enpui
