English Premier League club lian Manchester United chuan an manager Erik ten Hag an thlung nghet a, kum khat chhung atan an contract an pawhsei sak.
Dutch manager Erik ten Hag hian kum 2022 khan Ajax atangin Manchester United a zawm. United a enkawl chhungin beisei a phak lova, Premier League-ah beisei angin a chetthatpui thei lo. 2023-24 season-ah khan United hian beisei an phak lo lehzual a EPL-ah pariatna daih niin, League-a a dinhmun atang chuan European competition an khel phak lo. EPL-ah leh UCL lamah che chhe viau mah se FA Cup-ah Manchester City hnehin an champion mial thung a, hei vang hian Europa League an khel thei dawn. United a enkawl chhungin EPL-ah beisei phak lo mah se trophy pahnih a lakpui tawh thung.
FA Cup ah champion hlauh lo se United chuan Ten Hag hi an ban ngei tura ngaih a ni. FA Cup-ah a champion pui hnu pawhin a hma lam hun tur a chiang thei lo reng a. Manager thar tura an awh tak takte lak an awlsam dawn loh vangin United hian Ten Hag kawl chhunzawm an duh tak zawk a, a contrack neih mek bakah kum khat dang daih contract thar an ziahpui leh ta zawk.
Erik ten Hag hian Old Trafford-ah kum 2025 thleng cham turin contract a la nei a. Kum khat daih contract pek a ni leh ta bawk nen Old Trafford-ah hian kum 2026 thleng a cham thei dawn ta a ni.
United ah Ten Hag a nghet
