Pathianni zan khan English Premier League 2025-26 khelh chhunzawm a ni a, pathumna nih inchuh mek Manchester United leh Aston Villa te Old Trafford-ah an inhmachhawn. Inkhel hmuhnawm takah United in hnehna an chang a, point lia sang falin pathumna an luah nghet. An mualah United an chak laiin Liverpool eawh chuan Anfield-ah hnehna an chang zo lova, an mikhual Tottenham Hotspurs nen an inhnehtawk.
United in hma lam an pan
Manager lailawk Michael Carrick hnuai hmasawn tak Manchester United chu tlawlhthlu ve zauh mah se an thochhuak leh nghal a, an elpui lian Aston Villa chu 3-1 in an hneh a, pathumnaah an awm chhunzawm zel. United hian an mikhual Aston Villa lakah phu takin hnehna an chang a, top 3 huang luah an tumnaah hma lam an pan zui zel.
Pathumnaa awm mek United leh palina luah mektu Aston Villa te inkhel hi a hmuhnawm a, an inhnehtawk hle. Inkhel hmuhnawm takah goal lut a awm thei lawk lova, goal awm lovin chawlhlawk an hmang phawt.
Chawlhlawk hmain goal lut awm lo mah se chawlhlawk hnu lamah inkhel hmuhnawm zawk hmuh tur a awm a, goal li ngawt a lut ta hial. United tan hian midfielder Casemiro chuan Casemiro chuan Bruno Fernandes corner chhuih tha tak chu fuh zetin a tauh goal a, minute 53-naah hmahruaina goal a thun. Goal an thun vangin United phur viau mah se an phur rei thei bik lo. Aston Villa in an si phurh sut tumin tan an khawh a, goal pawh an thun ta thuai. Ross Barkley chuan minute 64-naah goal thunin an si phurh a sut a. Hei hian inkhel a tihmuhnawm leh zual.
Goal an an chhuah vangin United in chak ngei tumin tan an khawh thar leh a, na zawkin an mikhualte an nawr. An khingpuite nawrna na tak kara talchhuak United tan hian Matheus Cunha chuan Bruno Fernandes ball pek fing tak atangin goal thun theihna hun remchang a nei. A hun tha neih hi hlah lovin minute 71-naah a pet goal a, hma an hruai nawn lehna goal a thun.
Hma an hruai nawn leh hnuin Red Devils an khel tha chhunzawm a, hma lam pan zelin an hawikir tawh lo. Villa tlarhnung tih dik tawk loh hremin Michael Carrick hnuaia hmasawn tawk Benjamin Sesko chuan minute 81-naah an goal thumna a thun a, an chakna a nemnghet. Sesko goal thun hnuin goal dang a luh belh thei tawh lova, Manchester United chuan top 4 huang luah phak tuma an elpui lian Aston Villa lakah point thum hlu tak an hmu a, pathumnaah an luah chhunzawm. EPL-ah hian champion turin Arsenal dinhmun a tha viau tawh a, pahnihnaa awm mek City pawhin pahnihna an luah nghet rih viau. Pathumna leh Palina nih tuma inelna chu champion tuma inelna boruak ang zeta ngaihnawm leh hot a ni.
Pathianni zana inkhel dangah Liverpool chu an mikhual Tottenham lakah an chak zo lova, 1-1 in an inhnehtawk. An mualah an chak zawh loh vangin Reds hian an chunga awm Aston Villa chu an tum angin an hnaih thei lo. Liverpool lakah tlawm pumpelh mial mah se Tottenham dinhmun a la derthawng viau thung a, 16-naah an awm mek a, tlahniam thei dinhmuna ding mek West Ham United nen an point hmuh a inzat mek a ni.
Liverpool tan hian Dominik Szoboszlai chuan minute 18-naah hmahruaina goal a thun a. He goal hi minute 90-naah Richarlison-a’n a sut hram a, tlawm an pumpelh.
United in pa 3-na an luah nghet
