Rin phak baka an manager lakah dawh theihna an neih hnuin Manchester United chuan an mangager Erik ten Hag an chu thawhtan zan khan an ban ta nge nge. United hian manager thar an neih fel hmaa an team lo kaihruai turin an striker hlui Ruud van Nistelrooy an ruat.
EPL a club hlawhtling ber United hian season tharah bul an tan chhe hle. EPL-ah vawi kua khelin vawi thum chauh an chak a, draw vawi hnih an neih bakah tlawm zawkah vawi li ngawt an tang a. Red Devils hi Point 11 hmuin 14-naah an awm mek a ni. 2019 hnu lamah United hian EPL season thara an khelh hmasak pakuah point an hmuh tlem ber tum a ni tel bawk. EPL-ah an talbuai rualin Europa League lamah pawh an che tha lo viau a, team 36 zingah 21-na an ni mek bawk.
Season tharah bul an tan chhiat em vangin Dutch coach Erik ten Hag hi an ban thuai an ring fur a, october thla tir lama international break lai khan an inban fel tura ngaihna lian tak a awm lian hle. An inban tura ngaih a nih laiin an inruai chhunzawm teh tlat. International break hnua EPL an khelh hmasak berah Brentford an hneh teh mial. Brentford an hneh hnuin Europa League-ah Fenerbahce nen 1-1 in an inhnehtawk a. Boruak rit takin a delh laiin Inrinni zan khan West Ham United lakah an tlawm zui leh ta si a. Thawhtanni khan an manager Erik ten Hag hi an ban zui ta a ni.
Manchester United chuan Ajax manager hlui Erik ten Hag hi kum 2022 khan an ruai tan a. United a enkawl season hmasa berah pathumna a nihpui. A season hnihnaah erawh an che tha ta lo viau thung a, pakuana daih niin champions league an khel phak lo. Europa Conference League tak ngial pawh khel phak lo mah se FA Cup-ah an champion mial vangin Europa league an khel phak hlauh thung. 2023-24 season tawp rual khan United in Ten Hag hi an ban tura ngaihna lian tak a awm laiin kum khat daih contract thar an ziahpui leh teh tlat a. Season tharah game 9 an khel hnuin an inban zui leh ta a ni.
Ten Hag hian United a enkawl chhungin inelna hrang hrangah vawi 128 a kaihruai a, vawi 70 hnehna changin, draw vawi 23 an nei a, tlawm zawkah vawi 35 lai chang bawk mah se hnehna a chan zat hi 54.69% zet a ni. EPL-ah game 85 kaihruaiin point 146 a hlawhchhuahpui a. Sir Alex Ferguson-a’n United a enkawl tirh lam game 85-a point an hmuh aiin United hian Ten Hag hnuaiah point an hmu tha zawk tlat thung.
United manager hlui ni ta Ten Hag chuan hlawhtlinna chang tura a hmachhawpte tihthlawhtling turin thlawpna tha a dawn loh thu leh a duh zawng player a lak theih loh vangin chetthat a har thu a sawi. Dutch coach hian Cristiano Ronaldo chhuah hnu khan player hrawl lak luh a duh a, lak luh a duh zualte chu Erling Haaland, Vinicius Junior leh Lionel Messi te an ni. Player hrawl lak luh duh mah se club in sum leh pai an thehchhuak tam thei lova, duh thlan tur tha a neih theih loh thu a sawi uar viau bawk.
Red Devils hian an manager thar tur an zawng nghal char char a, Sporting Lisbon manager Ruben Amorim an dawr mek. Portuguese league-ah tum hnih Sporting champion pui tawhtu Amorim hi United in an manager thar tura an duh ber a ni mek a. Indawr mek mah se an inrem thei dawn em tih a la hriat loh.
United in Ten Hag an ban
