United States of America-ah Zoram Thar a Thleng mêk em ni?

Rev. Dr. Zaichhâwna Hlâwndo
Kum 2000-2002 chhung khan Synod Mission Board phalnain Calvin Theological Seminary, Grand Rapids, Michigan-ah Master degree in Mission zirin kan awm a. Chutih lai chuan America-ah Zofate kan la tam lutuk lo. Maryland lamah khan tlêmin an buk deuh a. State hrang hrangah pawh awm ve nual mah ila sawi tham kan la ni lo. MA ka zir zawh hnu khan USA hi vawi thum vel chu rei lo te chamin ka kal leh a. Mahse tun ang hian rawngbawlna neiin ka la kal lo.
May 2025 khan kan pafain Pathian Lal ram chanchintha leh hnam inpumkhatna thu tlangau turin USA-ah Lalpan min tir a. Michigan, Indiana, Iowa, Florida leh Colorado State-ah te rawngbawlna Lalpan min hawnsak a. Lalpan rem a tih chuan State dangte pawh kal te kan la tum mek! Vanneih thlâk takin Mizo Society of America te buatsaih Chapchâr Kût 2025 chu Des Mones, Iowa State-ah nghah niin chutah chuan Mafelin a kaihruai a, kei pawh thusawina hunte min pe a, remchâng takin ka lehkhabu ziah Introduction to Zoram Thar Encyclopaedia te pawh kan tlangzarh nghe nghe. Zo hnah thlak Zofate biak in hrang hrangah rawngbawlna kan nei a. Kohhran hrang hrang 10 chuangah thusawina hun pawh min pe tawh a. Pathianin a mite thinlung a lo buatsaih nasa tak zet a, thusawi pawh an dawngsawng tha hle.
Tun tum America kan kala kan thil hmuh leh hriatte hian min ti lawm êm êm a. America-a Zofate kan lo thahnem hle tawh a. Zofa unaute in pekna te, thilphal leh tlawmngaihna hi a ropui kan ti tak zet a ni. Mikhualte min duat êm êm a, kan kal duhna apiangah min hruai a, bazarah kal ila pawisa pek ve an phal lo. Hotel/ Restaurant-ah kal ila ei man kan pek an phal bawk si lo. A lawmawm rualin a inthlahrunawm duh khawp mai. Zo nun zemawi kha an chhawm nung tha tak zet a ni. Chi leh kuang emaw chhung khat laina hnai inhre sa pawh ni loin heti tak maia min lo duat hi kan lawm tak zet a, kan lawmthu an hnena kan sawina hi mipuite hriatah kan tarlang ve duh a ni.
Kum rei lo te chhungin Lalpa Pathianin Zofate USA-ah kan luh leh chen ve theih dan kawng min hawnsak a. A bikin khawchhak lama kan unaute tan kawng zau taka hawn a lo nih dante pawh hi thil mak leh lawmawm tak a ni. Tun huna Myanmar, Bangladesh leh Manipur (India) a Zofate chunga heti tak maia harsatna lo thleng tur laka riltam leh tuihala eitur nei lova Zofate kan awm lohna turin Zosefa din hmunah kan unau tam takte hi Lalpan America ramah hian a lo dah a ni tih hi hmuh hmaih phal chi a ni lo. Mizoram lam pawhin theih tawp kan lo chhuah angin USA Zofate hian tha thlah lovin nasa takin an chhawmdawlin ka hria a, theihtawp lo chhuah chhunzawm zel tur pawhin kan ngen a ni. He kan inpumkhatna leh hmangaihna hian kan beisei Zoram Thar kan thleng thuai dawn tih pawh a tichiang a ni.
USA Zofate Pathianin nasa takin malsawmnain min vur a. Indianapolis ah ringawt pawh mihring 30,000 chuang kan lo awm reng tawh a. In tha leh ropui tak tak te, Dawr lian tak tak te, Hotel/Restaurant te leh sumdawnna leh eizawnna kawng hrang hrangah pawh nasa takin kan thang. Zofate khawpui a nih hi mawle tih mai tur khawp alo ni ta mai hi Pathian hnathawh a ni chiang mai. USA-ah Zo hnah thlak hrang hrang Zofate Kohhran 200 chuang a awm tawh. Biak in lian pui puite chu Sap biak in ni lovin Zofate Biak In niin Kohhran member 3000 chuang neite pawh an awm. America rama Pathian Lal ram chanchintha hril turin nasa takin min buatsaih tih hi ka hmuh dan a ni.
India leh Myanmar-ah Zofate inpumkhatna thu kum 10 chuang kan buaipui tawh a, kan buaipui mek a, kan la buaipui zel dâwn. Tunah hian Zofate chênna hmunpui pakhat America ramah hian Lalpan min tirh angin chhiahhlawh hna chu thuawih takin kan thawk mêk a. Lalpan a lo ruat lawk vek tawh angin a hnam thlan Zosefa tu leh fate hi min ti pum khat zel a ni. Hnamah kan harh mêk a, kan harh kim hunah ram pawh ala piang thuai dawn a ni. Kan ram leh hnam lo ding tur chu a neitu Lalpa Isua Krista tan chauh a ni dawn a. Lal berte lal berin ro min rel sak hunah khawvel tana eng, hnamte tana eng leh khawvel pumpui tana tawngtaina inpui kan ni tawh dawn a ni.
Kan inpumkhatna tur kawng zau taka hawnin a awm mêk a. Khawvel hmun tina Zosefa tu leh fate hnamah harhin, hnam hrui khat i vuan tlat zel ang u khai. Tichuan Upa Lalnunpuia Hrahsel hnena hla hmanga Pathianin a lo puan lawk tawh ang khan Lalpa ram tiam Zoram Thar Kanan min thenkai ngei ang.