UNRWA-a fund pe thin ten titawp zui zel

Gaza-a UN agency operation atana sum thawh chu ram tak zawkin an titawp zui zel a, a chhan ber pawh 7 October 2023 a Hamas tena Israel an beihnaah UNRWA mi leh sa te an tel ve tih finfiah vang a ni.
Japan leh Australia-te chuan UN agency for Palestinian refugee, UNRWA te hnena sum an pek thin chu an titawp veleh ta bawk a ni.
A hmain US, UK, Germany leh Italy te pawh UNRWA hnena an sum pek titawp zingah an lo tel tawh a ni.
Hetihlai hian UNRWA chuan sum leh tanpuina an mamawh ngawih ngawih thu sawiin Gaza-a humanitarian tanpuina mamawhna chu a darkar tinin a nasa zual zel tiin an sawi.
UNRWA-te chuan 7 October-a Israel beihnaa inhnamhnawih an staff-te chu an ban tawh thu sawiin, khami tum khan Hamas silai kengte chuan Israel ramri kanin Israeli 1,300 chuang thatin mi 250 vel khawmin Gaza-ah an hruai zui a ni.
Israel thinrimin a beihletnaah mi 26,000 chuangin nunna an chan phah tawh niin Gaza-a Hamas-te enkawl health ministry chuan a sawi a. 1.7 million velin an chenna in chhuahsan tawhin UNRWA facility-ahte an awmkhawm mek tia sawi a ni bawk.
New York Times report chuan Israeli intelligence dossier an hmuh atang chuan UNRWA worker 200 vel zet chu Hamas emaw Islamic Jihad operative-te tiin a tarlang bawk.
He dossier hian 7 October-a Israel an runa nunna chan zingah pawh UNRWA worker 12 zet thi zingah an tel tiin tarlan a ni bawk a. UNRWA chuan an hnathawk pakua an ban tawh thu sawiin chhuichianna an nei mek tiin an sawi bawk.
Wall Street Journal-in report a tihchhuahah pawh Gaza a UNRWA employees 12,000 zet atanga 1,200 vel zet chu Hamas emaw Islamic Jihad-te nena inzawmna nei tiin a tarlang bawk.
Thawhtanni khan Israeli Prime Minister Benjamin Netanyahu chuan heng dossier chungchang hi sawiin ‘Hamas nena inchawhpawlh vek a ni’ tiin a sawi.
“7 October massacre-ah khan UNRWA worker 13 an tel ngei tih finfiahna kan nei a ni” tiin UK channel Talk TV tena an kawmnaah a sawi a.
“UNRWA school-ahte chuan Israel nuaibo doctrine te, terrorism doctrine, terrorism ngaih ropuina leh fakna te an zirtir a ni” tiin a sawi.
UN chuan engmah sawi a la nei duh lo thung a, internal investigation kalpui mek a ni a ti thung a. Mahse, Pathianni khan UN Secretary-General Antonio Guterres chuan 7 October massacre a UNRWA mi leh sa inhnamhnawiha sawi chu ‘rapthlak’ a tih thu a sawi thung a. Mahse, UNRWA operation atana ram tena sum an thawh chu titawp lo turin a ngen thung.
Pathianni khan UNRWA Commissioner-General Philippe Lazzarini chuan thuchhuah siamin, “Mi 12 puh zingah mi pakua chu ban nghal an ni a, pakhat chu a thi a, midang pahnih identity chu tihchian tum mek a ni” tiin 7 October massacre a UNRWA worker-te inhnamhnawih tia sawi chungchang a sawifiah a ni.
US Secretary of State Antony Blinken chuan UNRWA staff-te inhnamhanwiha report chu ‘ngaihmawhawm’ tia sawiin chung mite inhnamhnawihte chu hriatchian gei an nih theih nan chhuichianna kalpui ngei ngei tur a ti bawk.
Mahse UNRWA chu Gaza-a cheng mipa leh hmeichhia leh naupang tena an mamawh ngawih ngawihte an neih theih nana tihmakmawh a ni tia sawiin hei vang hian UNRWA chuan a hna a thawh chhunzawm zel a ngai a ti thung.
Thawhtanni vek khan Israeli Foreign Minister Israel Katz chuan Lazzarini nena inhmuh an tumna chu a thulh thu sawiin Lazzarini chu bang turin a ngiat nghal bawk a.
UNRWA chuan funding an dawng chhunzawm lo a nih chuan agency chuan February thla thleng bak an hna an thawk chhunzawm thei dawn lo an ti bawk a.
Hetihlai hian Japan foreign ministry chuan thuchhuah siamin Israel beihnaa UNRWA staff member te inhnamhnawih chuan a barakhaih takzet tia sawiin UNRWA chuan investigation neiin a inthianfai tur a ni tiin a sawi bawk a, Japan hian tanpuina sum a pek chhunzawm rih loh tur thu a sawi bawk a, Japan hi UNRWA hnena sum thawh tam lama parukna a ni.
Austria pawhin URWA te puh an nihna chu chhuichian ngei a phut thu a sawi bawk a.
Juliette Touma, UNRWA director of communication chuan puhna awm te chu an ngaih thutak thu sawiin Lazzarini chuan hma la nghalin 7 october massacre a inhnamhnawih nia puhte chu a ban nghal tiin a sawi.
“Kan mangang takzet a, Gaza-a humanitarian assistance mamawh vanglai ber a ni a. Mamawhna a darkar telin a nasa tial tial a ni” tia sawiin, “Chenna nei lo an awm zel a, mipui an riltam a, tam kan hnaih hle a ni” a ti bawk.
“|am kan tawh loh nan theih tawp kan chhuah mek a. Mahse, funding kan tlakchham tlat avangin harsatna kan tawk a, donor lian ber ber 10 ten min pe duh tawh rih lo va, hei hian nghawng a neih chu a nasa hle dawn a ni” tiin a sawi bawk.