UP-a cold storage chimah thawktu pali thi

UP-a cold storage chimah thawktu pali thi
Prayagraj, Uttar Pradesh-a cold storage thenkhat chim vangin mi pali an thi a, mi dang 14-in hliam an tuar a. He thil thleng vang hian ammonia gas put a awm a, rikruma hmalaa chet chhuah a ngaih phah.
Thuneitute chuan hliam tuarte hi a bul hnaia damdawi inah dah an ni tawh tih an sawi a, enkawl mek an ni a. Chhanchhuah hna thawh nghal a ni a, a hnuaiah hian mi tam zawk an tang ang tih an hlau hle bawk.
District Magistrate Manish Kumar Verma chuan PTI hnenah “He thil thlengah hian thawktu 14 an hliam a, SRN Hospital-ah enkawl mek an ni a. Pali an thi a ni,” a ti.
District thuneitu, police, State Disaster Response Force leh kang thelhtute team-ten chhawmdawl leh chhanchhuah hna an thawk a ni.
Police Commissioner Jogendra Kumar-a chuan Phaphamau Police Station huam chhunga Chandapur-ah cold storage section thenkhat hi a chim tih a sawi.
“A neitu hi Samajwadi Party MLA hlui, Ansar Ahmed-a nia sawi a ni,” a ti.
Kumar-a chuan, “Cold storage licence hi engtikah nge tihnun hnuhnun ber a nih tih leh engtin nge licence pek a nih tih hriat chian nan uluk takin kan chhui dawn a ni,” a ti.
Deputy Commissioner of Police (DCP), Ganga Nagar, Kuldeep Gunawat chuan a chim hnuah cold storage atangin ammonia gas a chhuak a, hei vang hian mipui rilru a chiai hle tih a sawi.
Fire brigade team-in gas put thunun tumin an bei tih a sawi bawk.
Prime Minister Narendra Modi leh Uttar Pradesh Chief Minister Yogi Adityanath-a te chuan thil thleng hi pawi an tih thu sawiin thi chhungte tan Rs. nuai 2 leh hliam tuarte tan Rs. 50,000 pek an nih thu an puang.