United Pentecostal Church (UPC) North East India General Conference vawi 56-na Kolasiba neihah General hruaitu thar an thlan bakah pastor thawk lai mi pathum nemngheh an ni.
Conference hi Zirtawpni zan atanga tan a ni a. Kum 2024- 2025 chhunga General hruaitu atan – General superintendent atan Rev. Zohmingthanzama (General secretary nilai); General secretary – Rev Lalmalsawma Sailo (General treasurer nilai) leh treasurer – Rev R Laichhingpuia (General Missions director nilai) thlan an ni.
Pathianni chawhma inkhawmah pastor thawklai mi pathum – Pastor Jacob Lalremsanga leh Pastor C Zoramthara, North Mizoram District leh Pastor Lalropuia Zote, Barak District chu ordination licence nei turin General superitendent kalchhuak tur Rev R Lalrinsanga chuan rinawmna thu tiamtirin a nemnghet a ni.
Conference-ah hian Rev John OverMaryland USA chu speaker a ni a. Pathianni inkhawm hi State Assembly speaker Lalbiakzama leh deputy speaker Lalfamkima te pawhin an chhim a ni.
Inkhawmpuiah hian North East India chhung bakah West Bengal, Bihar, Delhi leh Andaman atangin rorel palai 611 an kal a. Inrinnia ro an rel hi anmahni kohhran inkaihhruaina khawih lam hlir a ni. Member tam dan azira tual upa neih theih zat siamrem, inkhawmpuia rorel thei chin quarum siamthatte pawh a tel.
UPC (NEI) General chhungah hian District 12 – Mizoramah District 5 leh Mizoram pawnah District 7 a awm a ni. 2026 April -ah General Conference hi an hmang leh ang.
UPC-NEI hruaitu thar thlang
