US-a ruah sur nasaah mi pakua thi

US-a ruah sur nasaah mi pakua thi
US chhimchhak lama kartawpa ruah tam tak sur kaihhnawiha chhiatna thlengah mi pakua vel an thi a, kawngpui leh in chhia leh tuiin a chim a tam hle.
Kentucky Governor Andy Beshear chuan an state-ah mi pariat an thih thu a sawi a, Pathiannia thuthar lakhawmtute a kawmnaah an la pun theih thu a sawi bawk.
Tui lian vanga tangkhang mi tam tak, thenkhat an lirtheia tangte chu chhanchhuah an ni a, Beshear hian mi chengte chu ‘pawnah chhuak lova ina awm turin’ a ngen.
Georgia-ah mi pakhat a thi bawk a, an ina khuma a mu chu thing tluin a khumah a delh hlum.
Kentucky, Georgia, Alabama, Mississippi, Tennessee, Virginia, West Virginia leh North Carolina te chuan kartawp khan ruah tam tak an dawng hlawm a. State tam zawk hi September thlaa chhiatna nasa tak thlentu, Hurricane Helene lo tuar tawhte an ni.
State pariata mi maktaduai zahve vel chuan Pathianni zan thleng khan power an la nei lo niin poweroutage.us chuan a tar lang.
Kentucky-a thite hriat chian mek zel niin nu leh a fa kum sarih mi bakah putar kum 73 mi pawh an thi.
Kentucky hmun thenkhat hian hun rei lo te chhungin inches 6 ruah an dawng a, National Weather Service (NWS) chuan tui lian pawh thlen thei niin a sawi.
Ruah a tam avang hian luite an kuang atangin an luang liam a, lirtheite chu kawngpuiah an tan phah nasa hle tih thlalak thehdarhah a lang.
Governor Beshear chuan kawngpui 300 chuang khar a ni tih X-ah a tar lang.
White House hnenah emergency disaster puang turin a ngen a, sorkar laipui atanga puihna a dil bawk tih CBS News chuan a tar lang.
President Donald Trump-a pawhin pawmpuiin Federal Emergency Management Agency (Fema) chuan an pui zui dawn a ni.
Thuneitute chuan tui lian hi a nasat lai ber a la thleng lo niin an la sawi lawk.
“Lui chim chin hi a la sang zel,” tiin Kentucky Division of Emergency Management Director Eric Gibson chuan Pathianni khan a sawi.
NWS hotu, Bob Oravec pawhin, “A nghawng hi a la awm chhunzawm dawn a, lui a la lian a, tui lian hi a la awm rih ang,” a ti.
West Virginia Governor Patrick Morrisey pawhin Inrinni khan county 10-ah emergency a puang a, Pathianni khan pathumah a puan belh.
Fema enkawltu, Department of Homeland Security hotu, Kristi Noem-i chuan Governor Beshear leh Morrisey te nen an inbiak reng thu leh Tennessee Governor Bill Lee leh Alabama Governor Kay Ivey te hriat tur thuchah pawh a hnutchhiah tih a sawi.
Khaw chin zirtute chuan polar vortex-in kar tir lamah hian ram lailia Rocky Mountains hmar lam leh Plains hmar a pan mek tih an sawi bawk.
Colorado-ah chuan khaw vawh lam hi -10°C hial a ni thei dawn a, Denver khawpuiah chuan he thil lo thleng tur vang hian chenna in nei lo tan awmna tur an buatsaihsak.