US-ah President Trump-a an pawmna zat bi a tlahniam zel

US-ah President Trump-a an pawmna zat bi a tlahniam zel
A vawi hnih nana January-a president a nih leh tan hnuah US President Donald Trump-a chu mipuiin an pawmna dinhmun a hniam lai ber a tawng mek.
News agency Reuters leh research firm Ipsos ten ngaihdan an lakah hian chhangtu an tam sawt a, pawm lotu pawh an tam sawt bawk.
May thla laihawlah khan Trump-a president-a an pawmna hi 52% a nih laiin November-ah chuan 58 a kai ta a. A pawmna lam erawh chuan hma a sawn lo va, 40% vel niin May nen a la danglam tam lo.
Online-a ngaihdan lakna, ni ruk chhung awhah hian US puitling 1,200 chuangin an rama politic-a an mi langsarte an hmuh dan tar langin kum 2026-a midterm inthlana an vote turte pawh an tilang bawk.
Nakum inthlan turah hian Democrat-te chu an khingpui, Republican aiin an dinhmun a tha hret tur angin a lang a, hei hi tun thlaa Democratic-ten hnehna lian tak tak an chan nghawng nia ngaih a ni.
Democrat nia inchhal zingah 44% chuan kum 2026 inthlanah hian an party an vote ngei dawn tih an sawi chian ngam laiin Republican nia inchhal zingah erawh an party an vote ngei dawn tih sawi thei 26% chiah an awm thung.
Midterm inthlana Democrat an vote lohva inchhir tura inngai 79% an awm laiin Republican zingah erawh an party hi vote lo mah se inchhir tura inngai 68% chauh an awm ve thung.
Kum tharah hian House of Representatives-a seat 435 a ruak dawn a, Senate-a 100 awm zinga 35 a ruak bawk dawn a. Congress-a rorelna in hnih hi Republican-te tam zawkna ve ve a ni rih mek a. November 4-a off-year election-ah khan Democrat-ten hnehna an chang nual thung.
Virginia leh New Jersey-a governor thlanah chakin New York City mayor thlanah Zohran Mamdani a tling bawk.
Reuters-Ipsos poll hi Nilaini khan khar a ni a, Congress-in US chanchina sorkar inkhar rei ber titawp tura vote an thlak hma chiah kha a ni.
Ngaihdan laknaah hian vawiinah Congress inthlan awm ta se tu lam nge an vote dawn tih zawhna chhangtu 41 chuan Democratic candidate an vote tur thu an sawi a, 40-in Republican an thlak ve thung.