US-in an lawng bula thlawk Iranian drone kap thla

US-in an lawng bula thlawk Iranian drone kap thla
US sipai thupuangtu chuan Arabian Sea-a American indo thlawhnate phurtu lawng, aircraft carrier ‘tana hlauhawm theia thlawk’ Iranian drone an kap thla tih a sawi.
USS Abraham Lincoln atanga thlawh chhuahtir F-35C stealth fighter jet hmangin aircraft carrier leh an mite him nan ‘mahni inven nan’ drone hi Thawhlehni khan an kap thla tih US Central Command thupuangtu, Capt Tim Hawkins-a chuan a sawi a ni.
Lawng hi Iranian tuipui kam atanga mel 500 vela awm niin drone hian ‘eng nge tih a tum chiah hriat chian theih lohvin’ a pan niin a sawi.
He thil thlengah hian US hmanrua chhia a awm lo va, an mite zingah hliam pawh an awm lo.
Washington leh Tehran inkara boruak tang tak a awm mek laia US-in heng lai vela sipai a dah belh teuh teuh laiin he thil hi a thleng a ni.
US President Donald Trump-a chuan Iran hi nuclear programme an neih an kalpui mek thunun theihna tura inremna siampui tura an inbe thei lo a nih chuan sipai chakna hmanga beihah a vau reng.
Hemi hma, January thlaa Iranian-ten an sorkar duh lohna nasa taka an lantir laia Tehran-in tharuma a beih let lai pawh khan inrawlha mipuite chu puih a tum thu a lo sawi tawh bawk.
Iranian drone an kah thlak hnuah White House Press Secretary Karoline Leavitt-i chuan US leh Iran aiawhten tun kar tawpa nuclear chungchang sawihova inbiak an tum chu ruahmanna pagngai anga kalpui zel tum a nih thu Fox News a hrilh.
Trump-a hian ‘indawrna hmanga a theih chen chen thil kalpui hmasak phawt chu a duh dan a la ni reng’ tih Leavitt-i hian a sawi a; mahse, inbiakna turah hian ‘duhthlan tur chi hrang hrang dawhkanah a chhawp a, heng zingah hian sipai chakna hman pawh a tel’ tih a sawi bawk.
Iranian Supreme Leader Ayatollah Ali Khamenei-a chuan a hma khan an ramin beihna a tawh phawt chuan ‘regional war’ a chhuah phah dawn tiin US-in a lo vaukhan ve tawh bawk.
Tehran chuan Thawhlehnia US-in an drone an kah thlaksak nia an sawi chungchangah hian engmah sawi a la nei ve rih lo.
Thawhlehni vek khan Leavitt-i chuan Trump-a’n ram pawn lama palaia a hman hlun ber, US special envoy Steve Witkoff-a pawh White House aiawhin inbiaknaah hian a tel dawn tih a sawi bawk.
US chanchinbute chuan Witkoff-a hian Zirtawpni hian Istanbul-ah Iranian Foreign Minister Abbas Araghchi-a pawh a kawm dawn niin an tar lang hlawm a. Hetih lai hian US news website Axios chuan inbiakna hi Tehran chuan Oman-a sawn a duh niin a tar lang ve mek bawk.