United States chuan a tum khat nan draft UN resolution siam a tichhuakin Israel-Hmas indonaah Gaza-a tam tla a nasat zel avangin ‘inkahhaina’ a awm theih nan rawtna a siam.
Washington chuan a hmain Security Council a inkahhai rawtna chu ‘kalpui nghal tur’ tih tawngkam a tel avangin a lo hnawl tawh a. Mahse, tunah chuan US top diplomat Antony Blinken chuan an ngaihdan an thlak tak thu a sawi.
Blinken hian Egypt ah Arab ram panga foreign minister te hmuin inkahhai a awm theih nan erawh Palestinian militants tena October 7 a Israel an runa an mitang te chu an chhuah zalen ve tur a ni thung.
Israel chuan Gaza a bomb chu la chhunzawm zel thungin Hamas enkawl health ministry chuan mi 70-in nunna chanbelhin tihian indona avanga Gaza a nunna chan mi 32,000 chuang an tling tawh tiin a sawi a.
“Kan mut laiin bomb puak turu tak kan hria a ni” tiin Gaza-a cheng Mahmud Abu Arar chuan a sawi a. Bomb puak chu lirnghing ang mai tiin a sawi bawk.
Gaza-a hospital lian ber chu Israel chuan Palestinian militant te tawmkuk tia sawiin a dap zui a, Ningani khan hospital chhunga Hamas fighter 140 chuang tihhlumin an awm tiin a sawi.
Hamas te chuan Al-Shifa hospital complex zau tak damlo hlir awmna leh refugees te awmna in beih a tawk chu crime tiin a sawi a.
Gaza-a civilian infrastructure tam ber te chu a tlusawp tawh a, UN agencies te chuan Gaza-a cheng maktaduai 2.4 vel te chuan tam hmachhawn thei reng an ni tiin a sawi bawk.
United States chuan a hma zawng chuan thla ruk dawn indona kalpui tawhah UN Security Council-in inkahhai a rawtna te chu a veto zel a, thla kalta pawh khan Algeria in inkahhai rawtna a siam chu a lo veto tawh bawk.
Tunah erawh US in inkahhai awm theih nana ruahmanna a siamah chuan Gaza-a civilian te humhim nan leh tanpuina pek luh a nih theih nan inkahhaina a awm tur a ni tih a ni ta thung.
Vote lak hun tur sawi a la ni lo va, mahse, Blinken chuan Saudi media outlet Al Hadath hnenah resolution thlawpna chuan message khauh tak a pechhuak ang a ti.
US Secretary of State hi Qatar-ah te kalin Zirtawpni khan Israel a lut a, remna a awm theih nana hma la a ni a. Qatar talks neihnaah Hamas te chuan kar ruk inkahhai ni se lung in tang inthleng tawn leh
tanpuina pek luh ni se tia rawt a ni.
Mahse senior Hamas official Lebanona awm Osama Hamdan chuan Israel chuan rawtna siam te a uksak tha duh lo tiin a sawi thung.
Israel leh US te chu southern Gaza city Rafah chungchangah an ngaihdan a inang lo bawk a, US chuan Israel chu rafah luhchilh lo turin a ngen a ni.
Rafah-ah hian Palestinian tam tak inhumhim nan an tlan lut a, Israel prime minister Benjamin Netanyahu thung chuan Hamas te nuaichimit tak tak tur chuan Rafah chu luhchhuah ngai tiin a sawi thung.
US official-te chuan Netanyahu thil tum chu an thlawp thu sawiin mahse Israel chuan chhiatna turu tak a thlen loh nan ruahmanna dang a siam tur a ni an ti ve thung.
US-in Gaza-a inkahhai awm theih nan hma la chak ta
