US-in India laka tariff 25% lakna tur pawm, 25%-a tihsan belh tum bawk

US-in India laka tariff 25% lakna tur pawm, 25%-a tihsan belh tum bawk
US President Donald Trump-a chuan Russian tuialhthei a lei avanga India bungrua an lakuh luha chhiah (tariff) 25% lakna tur thupek chu a hming a ziah hnan ta a, 25% danga tihsan leh tumin a vau bawk.
A tisang leh a nih chuan tariff hi 50% a la dawn tihna a ni a, US-in chhiah a laksaka a sang ber zinga mi a ni ang.
Thupeka tar lan a nih dan chuan chhiah thar hi ni 21 hnu, August 27 atanga lak tan tur a ni.
Indian foreign ministry chuan Nilaini khan Delhi chu Tussia atanga thil a lak luha a dinna chiang takin a sawi tawh a, tariff sang laksak chu ‘tha lo, dik lo leh chhan mumal awm lo’ tiin a sawi.
Thuchhuah tawi a siamah, “US-in India laka tariff lak belh hi a vanduaithlak a, ram dangin anmahni hamthat nan an hmang bawk a ni,” tiin a tar lang.
“India chuan a tul angin a ram tana tha turin hma a la zel dawn,” tih a tar lang bawk.
US president hian a hmain chhiah sang a lak tur thu a sawinaah India hian ‘Russian indona hmanruaten Ukraine-a mi an thah chu engah mah a ngai lo’ niin a sawi.
Nilaini khan White House chuan thuchhuah a siamah ‘Russian sorkarin Ukraine-a chet a lak dan hi US himna leh ram dang nena an inkungkaihna atan hlauhawm a ni a, ramin rikrum a tawn atana na zawka hma lak a tul’ tih an tar lang.
India-in Russian tuialhthei a lak luh chu US-in Ukraine-a Russia chetna dal a tumna engah mah ngaih lohna niin an tar lang bawk.
US chuan ram dang pawh, Russia atanga tuialhthei la lutte chu ‘president-in a tul anga hma a lak turin thlen zel a ni ang’ tih an tar lang.
Tuialhthei leh boruakalhthei hi Russia-in a thawn chhuah tam ber niin Moscow dawrtu tam ber zingah China, India leh Turkey an tel.
Tariff sang zawk lakna tur nemngheh a nih hma lawk hian Trump-a palai, Steve Witkoff-a chuan Moscow-ah Russia leh Ukraine inkara inremna a awm theihna turin a kal.
India laka tariff lak belh a nih chuan India-in a thawn chhuah pawimawh tak tak – textiles, tlereuh, lirthei bungrua, lui lam sa te a tuar na tur niin hna tam tak pawhin tuar tel tura ngaih a ni.
iPhones telin electronic bungrua leh leh damdawi lam erawh la tihtel rih loh a ni.
Delhi hian a hmain Russian tuialhthei a lak luh avanga Trump-a’n chhiah lak san a tum chu ‘dik lo leh chhan awm lo’ tiin a lo sawi tawh bawk.
Indian foreign ministry thupuangtu chuan US hian indona a chhuah tirh khan India-in Russian boruakalhthei a lak chu tha a ti tih a sawi a. Russia atanga thil a lak luh tan chhan chu indona a chhuah hnuah a lak luhna thinten Europe lam an hawi tak vang a nih thu a sawi bawk.
India hian a hma pawhin a sumdawnpui ram lian ber, US hi chhiah a lak tam avangin a lo sawisel tawh a, amah ngei pawh Russia nena insumdawn tawn reng niin a sawi.
Nikum chhung khan a hrek chungin US leh Russia inkara sumdawnna sum che chu $ tluklehdingawn 3.5 a la ni.
Federation of India Exports Organisations chuan chhiah lak belh tumna awm chuan a barakhaih hle tih sawiin India-in America-a thil a thawn chhuah 55% chu a nghawng dawn niin a sawi.
Tariff sang lak chuan US-a Indian bungruate a to sawt dawn a, Global Trade Research Initiative (GTRI) chuan US-a thil thawn chhuah chu 40–50% velin a tlem thei dawn niin an chhut lawk.