US chuan kar kalta khan Israel hnena bomb a pek thin chu a titawp a, hei hi Israel-in southern Gaza a Rafah khawpui a luhchhuah a hlauh vang niin US senior administration official chuan a sawi.
US hian Israel hnenah 2,000lb (907 kg) bomb 1,800 leh 500lb bomb 1,700 a pek tum chu a thulh rih a ni tiin CBS News chuan a tarlang.
Israel chuan US-in Rafah beih a tumna lamah civilian te himna ruahmanna siam a phut chu US duh angin a ti hleithei lo tia sawi a ni.
Zan lamah erawh Israel chuan Gaza Strip a hmun thenkhat a beihna a la chhunzawm reng a, Israeli forces te chuan Egypt nena inrina Rafah crossing pawimawh tak chu an thunun tawh bawk.
Israel chuan tun hnaiah Rafah leh a chhehvel hnaiah bomb a thlak nasa a, Rafah hi entry point pawimawh niin Thawhtanni khan Israel chuan Rafah khawchhak lama cheng civilian te chu insaseng turin a lo ti tawh a, Hamas fighter leh an infrastructure te tichhe turin ‘limited’ operation a nei dawn a ti a ni.
Hetih lai vek hian inkahhai a awm theih nan leh Israeli mitang te leh Palestinian lung in tang te inthleng tawn a nih theih nan inbiakna kalpui mek zel a ni a. Cairo khawpuiah Israel leh Hamas aiawh te chuan palai te kaltlangin inbiakna an nei zui leh dawn a ni.
“US dinna chu Israel chuan Rafah khawpui mipui maktaduai chuang awmna leh khawiah mah tlanchhiatna nei tawh chuang lote awmnaah major ground operation a nei tur a ni lo,” tiin White House administration official chuan a sawi a.
“Kan Strategic Consultative Group format hnuaiah Israel nen Rafah a civilian te humanitarian thil mamawh te engtiangin nge tihhlawhtlin an tum tih leh Gaza ang lo takin Rafah khawpuiah engtiangin nge Hamas te laka chetlakna ruahmanna danglam insiam tih a ni,” tiin a sawi bawk a.
“Sawihona neih mek a ni a, kan ngaih pawimawh te chinfel a la ni lo. Israeli leaders te chuan operation neih ngei an tuma a lan avangin keini pawhin fimkhur takin Rafah beih nana hman theih tura ngaih ralthuamte pek zui loh kan ti a ni,” a ti bawk a.
“Kan thlir nawn hnuah kar kaltaa ralthuam kan thawn tawh chu kan thulh leh lailawk a. Ralthuam 2,000lb (907 kg) bomb 1,800 leh 500lb bomb 1,700 te chu kan pe rih lovang. A bik takin 2,000lb bomb chuan nghawng na tak a nei theia kan ngai pawimawh zual a ni. Heng ralthuamte hi pek zui tur a nih leh nih lohah thutlukna kan la siam fel lo,” tiin tarlan a ni bawk.
US-in Israel hnena bomb pek titawp rih
