US chuan Thawhlehnia a kah leh hnua President Donald Trump-a’n ‘zanin hian nasa takin kah a ni leh dawn’ tih a sawi hnuah Iran-ah beihpui a thlak thar leh.
Iranian sorkar chanchinbute chuan an ram chhim lam hmun thenkhatah puak a awm tih an tar lang a, heng zingah hian Strait of Hormuz-a lawng chawlhna khawpui, Sirik leh Bandar Abbas te pawh a tel.
Beihpui an thlak leh hnuah Trump-a chuan Truth Social-ah, “Hei hi nimina Iran-in lawng a bomb avanga phuba lakna a ni a. A ti leh a nih chuan a na tawh zawk ang!” a ti.
Gulf ramte chuan US a chet hnuah Iran-in a kap ve nghal tih an sawi a. Bahrain khawpui, Manama-ah thil puak a awm a, Kuwait-ah missile leh drone-a kahna lo kah thlak niin Qatar-in security alert a tichhuak bawk.
US nen an inbiaknaa palai hotu, Iranian parliamentary speaker ni bawk, Mohammad Bagher Ghalibaf-a chuan X-ah America chuan ‘tihnawmnah leh thutiam bawhchhiatna chu a man awm lo a ni lo tih a la hre lo’ tih a tar lang.
“Chiang takin ka sawi ang: i beih chuan tihlet i ni ang,” a ti a, Strait of Hormuz chu ‘American vauna’ hnuaiah ni lovin, Iran ruahmanna hnuaiah chauh hawn a ni dawn tih a sawi bawk.
US Central Command (Centcom) chuan beihpui thlakna hi tuipui pawimawh taka ‘Iran-in sumdawng lawng lian leh civil mite lawng a beih theihna tichhiat zual nan’ tih a nih thu a sawi.
Thuchhuah siamin Iranian sipai hmun 90 an kap tih a sawi a, heng zingah hian tuipui kama air defence system leh sipaite hmunhma pawimawhte pawh a tel.
Centcom chuan, “Beihnate hi a hma zana Iran-a beihna hlawhtling taka neih hnua tih a ni,” a ti bawk.
Iranian tuipui kam hmun dangah pawh thil puak ri eng emaw zat hriat a ni a, Konarak leh Chabahar khawpuiah te pawh puak ri a awm nia sawi a ni bawk.
Iranian sorkar TV chuan Bandar Abbas-ah hian puak pariat a awm tih a tar lang a, Iran chhim lam thova Sirik leh Jask-a lawng chawlhhmun chu missile pahnihin a fuh tih a tar lang bawk.
Iran leh United Arab Emirates inkara thliarkar, neitu zawk nih an inchuh mek, Abu Musa chu thil pahnih hmanga kah a ni tih an sawi bawk.
Iranian sorkar chanchinbu chuan Bandar Abbas-ah hian air defence system tihchak a ni tawh tih a tar lang.
US beihpui thlakna avang hian eng ang chhiatna nge thleng tih hriat chian a la ni lo va; mahse, Iranian chanchinbute chuan Chabahar-ah power tihtawp a nih thu leh Bushehr-a Islamic Revolutionary Guard Corps (IRGC) barrack-ah kangmei a chhuah thu an tar lang.
Chabahar-a power line pathum tihtawp zinga pahnih chu rang taka siam that a ni a, a pathumna chu hman tan thuai a nih tur thu Iranian Students’ News Agency chuan a sawi.
Nilaini chawhma lam khan Centcom chuan thuchhuah siamin Iran chu ‘tun hnaia sumdawng lawng leh civil mi thawkten international waterway pawimawh takah zalen taka an kal tur chu dik lo taka beihnaah mawh a phur’ tih a lo tar lang tawh.
Thawhlehni khan US sipaite chuan strait-a tanker pathum beihna chhan let nan ‘na takin’ beihpui an thlak thu an sawi.
Thawhlehni atanga Nilaini thlenga an inkahna kha US leh Iran inkara June 17-a inremna, memorandum of understanding (MoU) tia hriat an ziah hnuah an inbeih nasat ber a ni.
Trump-a chuan thla hmasaa Iran nena inkahhai thuthlung an ziah chu ‘a tawp tawh’ tih sawiin US chuan ‘nizanah na takin a bei’ a, ‘zanin hian nasa zawkin a bei leh mai thei’ a ti bawk.
US leh Iran an inkap chhunzawm leh
