US leh Russia inbia, an sawi la puang chiang lo
Donald Trump-a’n Ukraine nena inkahhai puang tura inremna ziak tura hum tiam a pek a liam dawn mek laia US palai, Steve Witkoff leh Russia-a Vladimir Putin inbiak chungchangah thuchhuah chiang lo deuh an siam.
Foreign policy-a hotu lian, Yuri Ushakov chuan Moscow-a inbiakna hi ram pahnihin ‘insiam thatna tur’ kawng lam an hawi niin a sawi.
Russia leh US hian thil pawimawh bika thawhhona turte pawh an sawi niin a sawi a; mahse, Witkoff-a’n US president hnena a thlen hma chu puan chian a rem lo tih a sawi.
US palai hian Nilaini chawhnu khan US a pan leh nghal niin Russian chanchinbute chuan an tar lang.
Russian chanchinbuten thlalak an tihchhuahah chuan Witkoff-a hi Moscow lailiah Putin-a palai, Kirill Dmitriev nen Nilaini tuk khan an leng kual tih a lang.
A hnua thlalak tihchhuah lehah chuan a hma pawha vawi eng emaw zat lo inkawm tawh, Putin-a leh Witkoff-a hi Kremlin-a hall-ah hlim hmel taka an inchibai lai a lang leh.
Darkar thum chhung inbiakna chungchangah hian US leh Ukraine chuan engmah sawi an la nei lo.
US president hian Russia hi Ukraine-a ‘indona rawng tak’ a titawp tura hma a la lo a nih chuan a thawhpui ramte kaltlanga na taka hrek a tum thu a sawi.
Witkoff-a’n Moscow a chhuahsan hnu lawkah hian White House chuan Trump-a’n India-in Russian tuialhthei a leisak avanga an ram atanga thil an lak luha chhiah 25% a lakna tur thupekah hming a ziah hnan.
Kar tirah khan US president hian India hian ‘Russian indona khawlten Ukraine-a mi tam tak an thah chu engah mah an ngai lo’ tiin a sawi a ni.
Nilainia inbiakna tan hma lawk khan Ukrainian President Volodymyr Zelensky-a chuan Russia chu pawisa a tlakchham tan chuan muanna lam hawi turin thil uluk taka a tih a ngai tih a sawi a. US-in Russian tuialhthei leitu ramte laka tariff sang zawk a lak pawh tha a tih thu a sawi.
Trump-a hian Kremlin hi Zirtawpni thleng inkahhai puang tura inremna ziah hun atan a pe a, hetih lai hian a thlen beiseiawm loh takin Russia hian boruak atangin nasa takin Ukraine a la bei chhunzawm zel.
January-a president a nih tan hma khan Trump-a hian Russia leh Ukraine indo chu a tihtawp nghal tur thu a sawi a; mahse, tun thlenga la hlawhchhamin na tak takin Russia a vau zel.
Kum thum leh a chanve kal taa an indo atangin Ukraine leh Russia hi Istanbul-ah vawi thum inbe tawhin indo tihtawp lam an la sawi thleng thei lo.
US leh Russia inbia, an sawi la puang chiang lo
