US nena sumdawmna thila inbiaknain tha lam a hawi – India

Indian foreign ministry thupuangtu chuan insumdawn tawnna inremna inbuk tawk leh hlawkpui tawn ve ve siam tumna kawngah US nen inbiakna tha tak an nei mek tih a sawi.
Ni thum chhung Washington-a Indian commerce ministry hotu lian, Darpan Jain-a kaihhruaia Indian sumdawng aiawhten US thuneitute biaa an tlawh hnua Ningani khan a puang a ni.
Kar tina chanchinbu mite a kawmnaah Randhir Jaiswal-a chuan, “Indawrna hi kalpui zel a la ni a, a tha zawng zel a ni,” a ti.
“Lehlam lehlam hian sumdawnna hlawkna inang leh inbuk tawk, hmalam hun thlir thei tur, inrem lohna leh thil pawimawh berte ngaihtuah chungin leh kum 2030-ah chuan insumdawn tawnnaa dollar tluklehdingawn 500 siam turin hma an la mek a ni,” a ti.
Ram pahnihten an insumdawn tawnnaa sum che vel zat tlintir an tum hi kum 2024-a an inkara dollar tluklehdingawn 212 vel che let aia tam a ni tihna a ni.
Inbiakna hi US-in ram dangte laka chhiah a lak dan a tihdanglam avanga hun khirh a awm mek laia New Delhi leh Washington-in sumdawnna thuthlung siam tura hmalakna an kalpui a ni.
Kar tir lam khan Union Trade Minister Piyush Goyal-a chuan ram pahnihte hian sumdawnna kaihhnawiha inremna hmasa ber chu an tifel hnai tih sawiin, a chipchiar zawk thil dang an sawi ho dawn tih a lo sawi tawh a ni.
Inbiakna kalpui mekah hian thutlukna siam la ni lo mah se an indawr chhunzawm zel dawn tih Indian sorkar thuneitu pakhat, a hming tar lan duh lo chuan sawi a, Indian palaite hi Zing zing lamah New Delhi-ah an kir leh beisei a nih thu a sawi bawk.
Sumdawnnaa inremna siam tumna, India thil siama US-in chhiah a lak thin tihniama 18% lak rawtna awm pawh US Supreme Court thutlukna avangin chiang lo takin a awm a, heti chung hian inbiakna hi chhunzawm zel a ni.
President Donald Trump-a’n India tela ram zawng zawng atanga thil lak luh atanga chhiah 10% hun eng emaw chen atan 10% lak a nih tur thu a puan hnua sorkarin Washington nena inremna siam tum chu sumdawnna lama mi thiamte leh eptu party-te chuan tha ti lovin sorkar chu zawhna an zawh phah.
New Delhi chuan inremna eng pawh hi June thlaa Washington-in a tihdanglam tum, Section 301 tariff tia sawi nen a inmil theih a beisei a, hei hian sector pawimawha chhiak lak a tidanglam thei a, inzawrhna tur a nghawng thei bawk.