US Open hmeichhe lam thlirna

Arab leh African hmeichhiate zinga tennis player hlawhtlingber Tunisian fifth seed Ons Jabeur chuan Inrinni khan Czech Marie Bouzkova laka 5-7, 7-6(5), 6-3 hnehna changin US Open third round a paltlang a, round of 16 lamah Chinese Zheng Qinwen a tum leh ang. Zheng hi 6-3, 4-6, 6-4-a Italian Lucia Bronzetti hnehtu a ni.
Third round match dangah tualchhung beiseina pahnih Pegula leh Keys an chak.
Jessica Pegula hian US Open fourth round a luhna kawngah Ukraine veteran leh 2019 US Open semi-finalist ni bawk Elina Svitolina chu 6-4, 4-6, 6-2-in a hneh a, American ve bawk Madison Keys nen an intum leh dawn a ni.
Third round inkhel dangah American 17th seed Keys chuan bul tan khawng viau lo mah se khel tha chho tulh tulhin 14th seed Liudmila Samsonova lakah 5-7, 6-2, 6-2 hnehna a chang.
Flushing Meadows-a tualchhung mi women’s champion hnuhnungber chu kum 2017 final-a a chipui Keys hnehtu Sloane Stephens kha a ni.
Inrinni inkhel dangah Wimbledon champion Marketa Vondrousova pawhin minute 56 lek chhungin Ekaterina Alexandrova lakah straight sets (6-2, 6-1) hnehna a chang a; kum nga chhunga Flushing Meadows bika fourth round a luh vawikhatna a ni.
Czech ninth seed Vondrousova hian thla hmasa mai khan All England Club-ah a Grand Slam title hmasa a hlawhchhuak a, New York khawpuia major title a beisei zui leh mekna kawngah American hope Peyton Stearns a tum leh ang.
Louis Armstrong Stadium lamah Belarusian second seed Aryna Sabalenka pawhin third round paltlangin, a tumpui France mi Clara Burel lakah 6-1, 6-1 hnehna nuamsa a chang a, unseeded player Burel tan New York zinkawng a tawp ta rih.
Sabalenka hian third-round match danga 13th seed Daria Kasatkina leh Belgian qualifier Greet Minnen inkhela chak zawk zawk a tum leh ang.
Zirtawpni khan Arthur Ashe Stadium chuan milar engemawzat mikhualin, chu’ng zingah chuan Justin Bieber leh a nupui Hailey Bieber hmuh tur an awm a, third round match pakhata tualchhung player Coco Gauff leh Elise Mertens inkhel an thlirliam.
American tleirawl kum 19 mi Gauff chuan 3-6 6-3 6-0 hnehna a chan hnuah Canadian zaithiam Justin Bieber hmuh laia tlawm kha a thei lo bur tih a sawichhuak!
ESPN hnenah Gauff chuan a inkhel entute chungchang sawiin, “Tutenge thu kha ka hrechiang a, k ainngaihtuah a, Justin Bieber-a hmuh laiin ka tlawm thiang lo ka ti a, ani ka hmuh khan engti kawng mahin ka chak a ngai tih ka hria,” tiin.
American mihang player hian a first round match thlirtute zinga president hlui Barack Obama leh a nupui Michelle Obama an tel thu a tarlang tel bawk.
A Grand Slam title hmasaber tur a beisei mekna kawngah sixth seed Gauff hian nimin khan world No. 1 hlui Caroline Wozniacki a hmachhawn zui leh a, result erawh tarlan hman a ni lo.
Kum 33 mi Wozniacki hian fa pahnih a hrin hnuah kum 2020 khan tennis khelh a chawlhsan zet a, thla hmasa mai khan khelmualah kirlehin, Grand Slam-a a kirleh hnuah Flushing Meadows-a chawlhkar hnihna a chuangkai leh ta phawt.