US palaiin Israel a tlawh, Palestinian 50 chuang thah leh an ni

US palaiin Israel a tlawh, Palestinian 50 chuang thah leh an ni
US special envoy Steve Witkoff-a’n Israel a tlawh mek laiin Nilaini khan Gaza hmar lama ramri kânna bul maia ei tur nghaka awm zinga mi Palestinian 50 chuang thah leh niin 400 velin hliam an tuar bawk niin damdawi inin an sawi.
Thlalak thehdarhah chuan Zikim crossing bul lawka thil thlenga hliam tuarte chu tawlailirin Gaza City-a al-Shifa damdawi in panpui an ni.
Gaza-a Hamas Civil Defence agency chuan puihna bungraw phur lotty kianga dingte chu Israeli sipaiten an kap niin an sawi a. Israeli sipaite erawh chuan intihthaihna atan an kap a, tumah tihnat tuma silai an hmeh puah loh thu an sawi thung.
Gaza-a Hamas health ministry chuan Nilainiah khan ei tur kham neih loh vanga thi pasarih awm lehin indo hnuah tam vangin mi 154 an thi ta niin an sawi.
al-Shifa hospital director Mohammed Abu Salmiya chuan Ningani tuk khan Zikim-a thi ruang 54 an dawn thu leh hliam tuar mi 412 an enkawl thu a sawi.
Nilaini zan khan Hamas Civil Defence agency chuan AFP news agency hnenah puihna thil nghak mi 30 vel Israeli sipaiten an kap hlum niin a sawi bawk.
Palestinian Red Crescent chuan Gaza-a an al-Saraya field hospital leh al-Quds hospital-ah ruang paruk leh hliam tuar mi 274 an dawn thu an sawi ve bawk.
US palai, Witkoff-a chuan Israel-a mi pawimawhte kawmin inkahhai kalpui a nih theih dan tur leh Gaza-a manganga awm mekte puih an nih theih dan tur a sawipui.
Israeli thuneitute chuan inkahhai leh mi hren chhuah chu tun hnaiah tih mai a nih a rinawm loh thu leh na zawka Hamas laka la chet an tum thu an sawi a. Israeli chanchinbute chuan Gaza hmun thenkhat luah pawh sawi rik a ni tih an tar lang.
Witkoff-a hian Israeli leh US thlawpa Gaza Humanitarian Foundation (GHF)-in puihna an semna hmunte pawh a tlawh dawn nia sawi a ni a. Heng hmunah hian ni tin deuhthaw puihna dawn tum Palestinian thah an ni thin nia sawi a ni.
Israel-a a palai a thlen hnu lawkah US President Donald Trump-a chuan, “Gaza-a mihring dinhmun chhe tak a tawpna tur chu Hamas AN INPEK LEH AN MI HREN CHHUAH A NI!” tiin social media-ah a tar lang.
Tar lan tawh thin angin Israeli sipaite hian October 7, 2023-a Hamas-in an ram chhim lam beia mi 1,200 chuang an thah leh hren tura mi 251 an hruai phuba lak nan Gaza hi an bei a. Tun thlengin indona chhuah hnuah mi 60,249 vel an thi tawh nia sawi a ni.