USA lakah India chak ve leh
World No 3 Australia laka hnehna an chan hnu lawkah India hmeichhe hockey team chuan kan hnung lawk tournament liana an ngam loh dang USA lakah phuba an la chhunzawm ve leh ta a, Pathianni zan Rourkela khaw FIH Pro League match-ah penalty shootout hmangin India hi 2-1-in an chak.
Hun pangngaiah team pahnih hi 1-1-in an intluk a; India-in minute 19-ah drag-flicker la naupang tak Deepika Kumari vuakluh hmangin hma an hruai zet a, minute 45-ah Ashley Seesa goal hmangin United States lamin an siphurh an sut a, goal dang a luh belh zawh tak loh hnuah shootout hmangin team pahnih pawhthen an ni.
Penalty inkhalhluhsiakah hian Mumtaz Khan leh Sonika-te’n mualneitu team tan an khung a, American team tan Leah Crouse a chefuh ve bawk.
Hnehna chang mah se a naute’n hun tam zawk inkhel an thunun chunga shootout an nghahchhuah a ngaih avangin Indian chief coach Janneke Schopman a lawm huam huam lo a, penalty corner an hmu zur zut chunga an hmangtangkailote kha inthlakna pindan lama a naute a zilhna tur a nih hmel!
Bhubaneswar lamah pawh khan Lalremsiami leh a thiante hian US nulate lakah 3-1 hnehna an lo chang tawh bawk a, mipui 20,000 pungkh awm hmaah hlauthawng takin home team-in hnehna an sualchhuak.
India hian home-a Pro League hmabak an neihte an tlingtla fel ta a, vawinga tlawmin, vawithum an chak a; USA vawihnih hnehin, Australia lakah vawikhat an chak bawk.
USA lakah India chak ve leh
