Vaivakawn Zohnuai leimin belh leh thin avangin mipui himna atan a thlanga kawngpui, National Highway 54 kawng chu lirthei eng chi mah kal theih lohin sawrkar chuan a khar rih a. Zohnuai kawng hmang loa lirthei tlan dan tur pawh siam danglam nghal a ni.
SP Aizawl Traffic-in mipui hriattirna a tihchhuah angin, HMV/ MMV ke 10 nei hnuailam chu Khatla atangin MINECO-ah Ebenezer Hospital-ah chhukin Chawnpui Kangthelh kawnah kalin Zonuamah an phei tlang anga, Hmingmawii Filling Station ah chhuak pheiin Luangmual Vengthlang lamah dinglamah let phei lehin, main road an pawh chho ang.
Hemi kawng bawkah hian FCI Godown leh Ramrikawn lam atangin an tlan chho thei anga; MINECO lam atangin zan dar 9.30 hnulamah, FCI kudam Ramrikawn atangin zan dar 7.00 hnulamah an lut chho thei dawn a ni.
Vaivakawn atanga Chhangurkawn inkar tlan dan tur pawh ruahman a ni a. City Bus/ University Bus chu Vaivakawn atangin Middle Kananah pheiin, Chawnpui leh Zotlang kaltlangin Chhangurkawnah an chhuak ang. An let leh lam chu Luangmual Vengthlang lamah pheiin Ainawn Veng kawngah John Neihlaia Petrol Pump lamah MINECO leh Khatla kaltlangin SA Temple pan tur a ni.
Vaivakawn Middle Kanan, Chawnpui, Zotlang – Chhhangurkawn City Bus/ University Bus kalna tura ruatah hian lirthei eng chi mah kawng dungah dah phal a ni lo.
LMV (407 truck tel loin) chu Vaivakawn atangin Seventh Day Tlang lama chhoin, DM&R directorate office bul atanga Chawnpui kawnah chhukthla in, Vankhama Vengah kawngpui a zuk pawh anga, Zotlang atangin Chhhangurkawn a pawh thla anga, Seventh Day Tlang atangin Zotlang pawhin a chhukthlak theih bawk.
Chhangurkawn lam atangin a route pangngai Zohnuai peng kaltlangin Vaivakawn an kal thei anga; Vaivakawn lam atangin Chhangurkawn lamah Zohnuai peng kaltlangin LMV kal phal a ni lo.
Two wheeler bik chu Vaivakawn to Chhangurkawn ah hian kawng pangngaiah a tawn tawnin a kal theih a ni.
He thupek hian chhiatrupna thil, kangmei leh emergency kaihhnawiha duty, dan leh thupek pawimawh bika police leh magistrate duty-te chetvelna a huam lo tih sawi a ni a. Thupek zawm lo chu Section 179 MV (Amendment) Act 2019 hmanga hrem theih an ni tih a sawi.
Vaivakawn leimin vangin lirthei tlan dan siamtha
