Aizawl Municipal huamchhunga lo khap tawh vawk vulh chu a hmun azir leh a vulh turte azirin phalsak tum an ni a, Board of Corporator-in an remtih chuan a taka hman a ni ang tih Aizawl mayor H Lalremtluanga chuan a sawi.
Thawhtannia ZPM office-a inkhawmah an party adviser, Aizawl mayor H Lalremtluanga hian, kumin May 7-a AMC enkawl tura lakluh an nih atanga ni 108 hnua hma an lak dan a sawi a. Aizawl Municipal Corporation-in department a chan lian zual 9-ah executive corporator hona hnuaiah Study Team an siam a, AMC hmalak tawhna zirchiangin rawtna an siam a. Chumi hmang chuan hma an la a, vawi leh khata tih fel mai theih a awm lain, dan siamthat ngai leh nghah rei deuh ngai chi pawh a awm nual tih a sawi a ni.
AMC inthlan dawna an aupui, AMC huamchhunga khap tawh, vawk vulh phalna ennawn chu an zirchiang a, hmeithai leh pahmei, vawk vulh innghahna atana lo hmang ve tang tang thin tan a hmun azira vulh theihna tur local council-te nen zirchiangin an peih tawh a. BOC thutkhawmah chhawpchhuah a ni anga, pass a nih hnuah hma lak a ni dawn tih a sawi.
BOC thutkhawm hi August 28-a neih tur a ni tih mayor hian a sawi a. Hemi rual hian ‘shop license zone wise’ in an thut/ dawr hawn man chawi zat tur an siam tih a sawi bawk a. Dawrkai a lian a te, hausa leh rethei chawi zat inang thup mai thin chu zone wise-in, kawngpui dung leh hmun hulum deuh lai amite chawi zat tur a hranga bithliahin, fel taka siam a ni dawn tih a sawi a. Hei pawh hi BOC hian a pass phawt a ngai dawn tih a sawi a ni.
Sawrkarna an siam atanga thlakhat awrh a liam hnuah, Municipal Act beisei angin budget estimate an siam a. 2026- 2027 Budget Estimate chu nuai 12754.93 niin, hei hi kum 2025-2026 BE aiin nuai 1537.04 in a tam zawk tih a sawi. AMC budget-ah hian mipui kaihhnawih leh hmasawnna ruhrel siamna atan zaa 79.09 dah a ni a, hei hi an inchhuan ve na a ni tih sawiin, “Budget sum hnar tur hi Central Finance Commission Grants 69.48% leh State Grants 20.86% niin, AMC sum thawhchhuah – own source revenue (OSR) chu 9.66% a ni. Kan OSR ber ala hniam avangin mahni ngeia sum tam zawk thawk chhuak a, khawpui tan tangkai zawka hna thawk thei turin nasa takin kan inbuatsaih a. Licensing leh fees ennawn a nih bakah kum 15 kalta chhunga assets hrang hrang kan din, sum lalut mumal lo pawh tuaithar tumin kan umzui mek,” a ti.
Vawk vulh phalna tur chiang tawh
