Lirnghing zawn pahnihin Venezuela a sawi avanga thi chu mi 3,811 an tling ta tih National Assembly President Jorge Rodriguez-a’n Nilainia a chhinchhiahna a tihchhuahah a tar lang.
June 24-a lirnghing avanga hliam pawh mi 16,740 an ni ta a, chenna in nei lo mi 17,907 vel an la awm bawk.
President lailawk, Delcy Rodriguez-i chuan lirnghing avanga chhiatna an tawhte tun dina an thawh chhuah leh theihna tura pui turin Venezuela-in ram dangte hrekna an tawrh mek hlih a nih theih nan a ngenna thar a siam thar leh a, ram danga an account dansakte phelh a nih chuan intun din lehna tur sum an neih theih phah dawn tih a sawi.
President chuan sorkar television channel VTV-ah, “Venezuela hi khawvel hmun hrang hranga a thil neihte dansak a ni a, hei hian kan indun din lehna turah harsatna a siam thei a ni,” a ti a, hnathawhna leh zirna thil hrang hrang atan pawh sum mamawh a nih thu a sawi.
US, European Union leh ram dangte chuan kum 20 chuang kalta atang khan Venezuela hi an sorkarin mipui rorelna kalhmang dodalna a kalpui nia a sawi vang leh ruihhlo tawlhrukna hmun nia puhin chungah hrekna khauh zawk an siam tih a sawi.
Kumin kum tir lama US-in Venezuelan President Nicolas Maduro a man hnuah Washington chuan an rama tuialhthei bikah a hrekna thenkhat a hlip a; mahse, hrekna dang tam tak a la tuar.
Lirnghing a thlen hnu hian US hian a hrekna zinga mi hlih sak then lehin thla li chhung atan lirnghing chhawmdawlna kaihhnawihah sum leh pai khawih phalna a pe bawk.
Rodriguez-i chuan King Charles hnenah lehkha thawnin Bank of England-a Venezuela rangkachak chu chhuahtir turin a ngen tih a sawi a. International Monetary Fund (IMF) hotu nen sum tihchhuah chungchangah an inbia tih a sawi bawk.
Bank of England chuan Venezuela rangkachak ton 31 vel awm chu pek chhuah a phal lo va, British court-ah pawh hun rei tak inhnialna a awm phah tawh a ni.
Venezuela lirnghingah mi 3,811 thi awm tawh
