Venhim uluk zual ngai PS 30 awm

Mizorama MLA inthlan neih turah venhim uluk zual ngai polling station 30 a awm a. State pawn atanga rawn kal silai keng sipaiten an veng bik ang.
Election hotute sawi danin, venhim uluk zual ngai hi chi hnih – critical lek vulnerable a then niin, critical-a puan hi Lawngtlai district Tuichawng biala Boraguisury polling station a ni. 2018 inthlanpuiah khan Tuichawng bial candidate pakhat, Kali Kumar Tongchangya chuan vote tla zaa 93.37 atangin zaa 86.73 a hui a, hetianga vote tla sang leh candidate-in a hui zawh deuhthaw hi vil ngun ngaia ngaih a ni.
Polling station ven uluk zual ngai 29 dang chu – Mamit district-ah P/S 13 a awm a; Hachhek Assembly bialah tam berin P/S 8 a awm a, Dampa bialah P/S 3 leh Mamit bialah P/S 2 a ni. Kolasib district-ah P/S 7 awmin Kolasib bialah 1 leh Serlui bialah 6 a ni.
Aizawl district-ah Tuivawl bialah P/S 3 a awm a. Champhai district-ah P/S 4 awmin Champhai South leh East Tuipui bialah 2 ve ve a ni. Lawngtlai district-a Tuichawng bialah P/S 2 a awm a. Tarlan tak Boraguisury P/S hi a tel a ni.
Vulnerable leh critical polling station-a puante hi CAPF (central armed police force) ten an ven dawn bakah video hmanga thlalak ‘webcasting’ leh hmanraw dang hmanga chik taka vil a ni dawn a. Micro observer pakhatin polling station hi a vil bawk ang. Hetiang polling station-a inthlan buaipui lama hotu ber – presiding officer chuan vote thlak turten anmahni ngei an ni tih tihchianna an kente uluk lehzualin a endik sak dawn a ni.