Pathianni khan damdawi thiamna zir tumte tana exam pawimawh, National Eligibility cum Entrance Test (NEET) chu exam that leh a ni ta a, zirlai nuai 22 chuang an inlan.
National Testing Agency (NTA) chuan May thla tir khan a exam a lo buatsaih tawh a; mahse, a hnuah zawhna put a awm nia sawi a nih avangin cancel a ni a. Exam nawn leh hi zirlaite tan bakah a buatsaihtu leh sorkar laipui tan pawha fiahna tling a ni tel.
Zawhna put ru hian boruak a nei lian hle a, mi tam tak thin tiurin Education Minister Dharmendra Pradhan-a bân phutna pawh a ri ring hle a. Sorkar laipui chuan pawi a tih thu a sawi rualin langtlang zawka kalpui turin exam nawn leh turin thu a titlu ta a ni.
Exam nawn leh hi chawhnu dar 02:00 atanga tlai dar 05.15 thleng neih a ni a. Pianphunga rualbanlote tan erawh tlai dar 06.20 thleng hun pek a ni.
NTA chuan zirlaite chu an admit card, thlalak ID dik tak leh passport-size thlalak pahnih keng tura tiin chawhnu dar 01.30 hnu lamah centra-a luh an phal tawh lo.
Tun tumah hian zawhna put a awm tawh lohna turin a phurh kualnaah venhimna khauh tak hman niin Indian Air Force-in thlawhna hmangin an phurh a. NTA chuan pawhin Inrinni khan ram pum huapin mock drill a buatsaih bawk.
Pradhan-a chuan Ningani khan hotu liante nena thutkhawm kaihhruaiin thuneitute chu fimkhur leh inbuatsaih kim kapui turin a ti a. Exam kalpui danah dikna, langtlang leh a tha ber zawm a ngai tih a sawi.
Union education ministry-in a ruat officer-te state tinah dah an ni a, exam nawn kaihhnawih hmalaknate chu NTA director general kaihhruai central command center-ah report leh tur a ni bawk.
NTA chuan India-a khawpui 551-a center 5,440 leh ram pawna center 14-a medical entrance exam neih a nih thu leh ‘inbuatsaihna tha thai ang ber’ kalpui a nih thu a sawi a, saptawng bakah India-a tawng 12-a neih a ni.
Exam hi pindan 95,000 chuangah neih niin room tinah CCTV camera dah a ni a. “CCTV camera 1,38,560 dah a ni a, national, state leh ministry level-ah en vek a ni a. Electronic fel lo eng emaw a awm veng turin jammer 51,311 dah a ni bawk,” a ti.
NTA chuan state leh district thuneitute nen tanghovin buaina awm loh nan police, paramilitary force, IAF leh Department of Posts an thawkho tih a sawi.
“Centre tinah vengtu 40 atanga 50 vel dah a ni a. Bank branch 1,500 vel-ah thawktu dah an ni a, Department of Posts-in ram puma collection centre 700 velah OMR sheet lakhawm tur team a siam a ni,” a ti.
Hetih lai hian Cockroach Janta Party (CJP)huaihawtin Pradhan-a bân phutna lantirna chu Delhi-ah chhunzawm a ni bawk.
Venhimna leh inbuatsaihna thar hnuaiah sawi hlawh NEET exam nawn
