Victoria’s Secret Fashion Show-ah Cher leh Tyla
Khawvela fashion show thawm nei lian ber ni thin Victoria’s Secret Fashion Show chu kuminah an nei leh dawn ta a, 2018 hnua he show hi an neih lehna hmasa ber tur niin, Cher-i’n show a headline dawn a, Tyla pawh a inlan ang. Tun tum hi he fashion show-a hmeichhe hlang an perform vawi khatna tur a ni.
Victoria’s Secret ian an Instagram-ah Cher, kum 78, video an phochhuak a, 1998-a a hla hit, Billboard Hot 100-a No.1 kai thei ‘Believe’ hla a sa lai niin, a caption-ah, “Hmeichhe khawvel a ni lawm le, chuvangin amah fashion lama nuber @Cher tel loa fashion show neih te chu khuang lova chai ang a ni dawn asin,” an ti a, “Mahse, a mal dawn lo, lo ngaichang rawh u, a vawi khat nan hmeichhe hlang an inlan dawn a, kan rawn puan zel ang,” an ti bawk.
Hemi hnuah hian Tyla pawh Victoria’s Secret runway-ah hian a perform dawn tih an puang leh tawh a, he South African artist hian, “Victoria’s Secret Fashion Show chawm len kan ni a, an thawmhnaw, an thlalem ropui leh model duhawm tak tak te nen. Tunah he stage ropuiah ka perform ve dawn ta mai hi ka phur tak zet a ni,” a ti.
Victoria’s Secret Fashion Show hi 1995 atanga 2018 thleng khan kumtin an nei thin a, 2019 khan neuh neuh an nei ve a, an show neih tur an thulh a, kuminah an chhunzawm leh dawn ta chauh a ni. Nikum khan Victoria’s Secret: The Tour ‘23’ an tichhuak a, hetah hian supermodel hrang hrang Adriana Lima, Gigi Hadid, Emily Ratajkowski leh Hailey Bieber te khawpui hrang hrangah an inlanna footage dahin, Doja Cat a perform a, hei hi Prime Video special-in an tichhuak a ni.
Kumin VS Fashion Show hi October ni 15 hian Brooklyn, New York-ah an nei dawn a, show an kalpui dan tur an puang lo a, model inlan tur zingah Gigi Hadid leh Tyra Banks an tel tih a chiang tawh a, model ten an thlalem (wings) pawh an rawn thawhchhuah pui leh ngei dawn e.
Company lam chuan an Instagram-ah, “Victoria’s Secret Fashion Show a rawn kir leh dawn ta a, vawiina kan dinhmun kan rawn pholang ang a, hei bakah hian inlo hriat tawh leh ngainat- runway, thlalem, musical entertainment leh thil dang te pawh a awm leh ang,” an ti bawk.
Victoria’s Secret Fashion Show-ah Cher leh Tyla
