Tun hnaia 9th NITI Aayog Governing Council meeting-ah, ‘Mizoram chief minister Lalduhoma’n Mizorama ‘Viksit Bharat 2047’ a hlawhtlin theihna tur thil pawimawhte a thlen’ tiin sawrkar thuchhuahah tarlan a ni a. Thil pawimawhte hi – inkalpawhna kawng tha zawk leh tam zawk, zirna, hriselna, tui, power, faina leh administrative infrastructure indailohna nasa phuhrukna tur… a tam mai, thil zawng zawng deuhthaw kan mamawh a ni mai awm e. A tawp lamah peace dividend (peace bonus ang deuh) ngaihtuahsak kan mamawh thu te pawh a tel bawk.
India ramin zalenna a neih atanga a kum 100-na 2047-ah chuan India ram hi ‘developed nation’ tia chhal theih tura hlankai hman tuma tanlakna “Viksit Bharat 2047” dungthulin India ram chuan beihpui a thlak mup mup reng a. Mizoram state pawh India ram peng pakhat a nih angin ‘Developed Nation’ dinhmuna inhlangkai tel ve thei tura chawikan/tihchangkan/tihhmasawn a ngai a, chumi atan chuan mamawh pawh kan la ngah hle. Mahni thawh chhuah hmanga kan dinhmun chawikang tur chuan theihna hi kan nei chau em em a, tuna kan buaipui theih tawk nia lang ta mai chu, kan leiba hi eng tin nge kan rulh tlingtlak theih ang, tihte hi a ni ber a, hmasawnna tur lam hawia beihpui thlak turin engkim tlachawp ring, intodelhna nei reng reng lo kan nih miau avangin, kan chief minister-in 9th NITI Aayog Governing Council meeting-a a thu thlente hi thlen awm ngawih ngawih vek a ni awm e. State dangte pawhin engemaw chen chu central tha chakna an rin a ngai ve dawn tho tih a lang reng.
Tuna kan chief minister thu thlente hi, meeting dinhmun azira thu thlen awm tak tak a ni kan tih rual hian, a lehlamah chuan, engatinge a engah mai pawh hian Central hotute ‘dil… dil… dil…’ kan la tih reng mai tihah hian inenfiahna tur hi kan nei ve bawk awm e. Dil loh tur tihna a ni lo a, pa ber chan chang Centre hi kan dil tur pawh a ni, mahse englai mai pawha engkim mai deuhthaw dil reng tur kan ni bik em? Dil ngai lo tura mahnia intodelh theihna tur eng nge kan neih? Chutiang tur chuan eng tin nge tan kan lak? tihah te hian inenfiah a pawimawh awm e. Remna leh muanna kan neih atanga kum 35 chuang a liam tawh hnuah pawh ‘peace bonus’ emaw, ‘peace dividend’ emaw kan la lam ri reng mai te pawh hi a tlawmthlak dawn dawn, a ni em em tawh bik dawn em ni? a tih theih awm e.
Kum 100-na thleng tura kum 23 lek la awmah hian, ‘developed nation’ nih theihna daltu state kan ni bik ang tih a hlauhawm hle a, a dil lama thahnem kan ngaih tluk bawk hian, a thawh lamah pawh thahnem kan ngaih a pawimawh hle a ni.
‘Viksit Bharat 2047’ leh Mizoram..
