Pathianni zana English Premier League khelhah palinaa awm mek Aston Villa in an mualah hnehna an chang a, pathumnaa awm Manchester United nen an inkar an tizim. Villa an chak lai hian Tottenam Hotspurs tlawm a, an dinhmun a chhe zual zel. Spurs rual hian Newcastle United pawh an mualah an tlawm ve bawk.
Villa an phur
Season kal meka chetha, top 4 huanga awm deuh ngar ngar Aston Villa chu tunhnaiah an tlawlhthlu zeuh zeuh a, pathumna atangin palinaah an tlahniam hial tawh. An chunga awm United hi zirtawp zan khan an chak lova, point hnih an hloh. United chak zo lo hian Aston Villa a tiphur a, chak duhna lian zawk a pe. Villa Park-a an mikhual West Ham lakah 2-0 in an chak zui ta reng a ni.
Chak ngei tuma tan khawh Villa hian an mualah tha takin bul an tan a, John McGinn chuan inkhel tan atanga minute 15-na lekah hmaruaina goal a thun. Hma taka goal an thun hi Ollie Watkins chuan minute 68-naah goal thunin an hmahruaina a tichhah zual a, chak an mamawhna inkhelah hnehna changin point thum hlu tak an hmu zui ta a ni.
An mualah an chak vangin Aston Villa hian pathumnaa awm mek Manchester United an hnaih leh zual. Villa hian khelh 31 atangin 51 an hmu a, an chung chiaha awm United nen hian point khat chiahin an inthlau tawh. Heti a nih vang hian pathumna nih inchuhna boruak a nung thar hle.
Sunderland in Newcastle an lehthal
Pathianni zana inkhel dangah St James Park-a lenglut Sunderland chuan hma taka si phur chungin mualneitu Newcastle United an lehthal a, point thum hmu tak hmuin European competition khelh phak beiseina sang zawk an nei thar.
European competition khelh phak tuma tan khawh Newcastle United hian an mualah bul an tan tha viau a, inkhel tan atanga minute 10-na lekah Anthony Gordon goal thun hmangin hma an hruai nghal. Hma takah goal thunin, hun eng emaw chen hmahruai bawk mah se chawlhlawk hnu lamah an tang tluan zo lova, goal hnih an chhuah.
Sason kal mekah beisei phak baka khel tha Sunderland tan hian Chemsdine Talbi chuan minute 57-naah goal thunin an si phurh a sut. Hun rei tak chhung goal lut a awm belh thei lova, 1-1 a an inhnehtawk reng hnuin Brian Brobbey chuan minute 90-naah Sunderland hmahruai letna goal a thun a. Newcastle United mualah hnehna changin point thum hlu tak an hmu zui ta a ni.
Sunderland hian khelh 31 atangin point 43 an hmu a, an hneh tak Newcastle lehpelin 11-naah an inhlangkai. 11-naah daih la awm bawk mah se pa 7-naa awm mek Brentford nen point thum chauhin an inthlau a, khelh sarih khelh hmabak an la neih bawk vangin European competition khelh phak theihna hun tha tak an la nei.
Tottenham an buai zual.
Season kal mekah beisei phak baka chechhia Tottenham Hotspurs chu Pathianni zana an mikhual Nottingham Forrest lakah 3-0 ngawtin an mualpho a, tlakniam hlauhawm leh zualah an awm. An hnuaia awm lakah an mualpho zui leh vangin Tottenham dinhmun a chhe leh zual.
Nottingham Forrest hian an chunga awm Tottenham lakah an khel tha viau a, Igor Jesus chuan chawlhlawk dawn hnaih minute 45-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah Forrest an khel tha leh zual a, goal hnih an thun belh. Morgan Gibbs-White chuan minute 62-naah an goal hnihna thunin an hmahruaina a tizau a. Hun tawp dawn hnaih minute 87-naah Taiwo Awoniyi chuan an goal thumna a thun zui leh a, an chakna a nem nghet a. Tottenham lakah hnehna changin point thum hlu tak an hmu.
An mualah an tlawm leh tak vangin Tottenham dinhmun a chhe tak zet tawh. Spurs hi 17-naah awmin, la him chiah chiah mah se an hnuai chiaha awm West Ham United nen point khat chauhin an inthlau. Tottenham hnehna hma lam an pan hret vangin Nottingham thawkhat a ven phah ve thung.
Villa in United an hnaih
