Siaha district Tipa (Tuipang) ah vohbikte tan identity card siam runpui (assessment camp) neih a ni a. Lawngtlai district Bungtlang South-ah vohbik tan health camp neih a ni bawk.
Primary Health Centre Tipa-ah Zirtawpni khan ‘rualbanlote tan identity card siam runpui’ (assessment camp) neih a ni a. Zoram Medical College & Hospital leh District Hospital Siaha-a doctor leh thawktu dangte an kal. Specialist medical doctor kal hi – ENT, medicine, ophthalmology, orthopaedics /PMR, paediatrics, psychiatry niin clinical psychologist, audiologist leh optometrist an tel bawk.
Siaha district khaw hrang hrang atangin mi engemawzat an kalkhawm a, uluk taka en niin rualbanlo certificate mi 180 pek chhuah an ni. Rualbanlote tan Aadhaar enrollment (thar) leh siamthat ngaite a thlawnin siamthat sak an ni bawk.
Vohbikte hian sawrkar atanga hamthatna dawng turin UDID card an neih zel a ngai tawh a. UDID card siam tur hian an awmna District Hospital emaw Aizawl emaw an pan a ngai thin. UDID card siam kawnga an harsatna sutkian a nih theihnan leh anmahni puala hamthatna sawrkarin a duante an dawn theihnan UDID Assessment Camp hi kalpui a ni.
Assessment camp-hi Mizoram sawrkar hnuaia Social Welfare department leh Health & Family Welfare department tangdun buatsaih a ni a. Siaha district-ah chuan Social Welfare Department-a thawktute hmalaknain Health & Family Welfare Department, Mara Chanô Py (MChP), BDO Tipa leh PHC Tipa tanghoin neih a ni.
Social Welfare Department bultumin Ningani khan Primary Health Centre Bungtlang South-ah vohbikte (persons with disabilities) hriselna endik a ni bawk a. Khaw 34 atangin mi 184 an inentir a, heng zinga 124 chu PwD an ni tih finfiah niin, heng finfiahte hnenah hian PwD certificate hlan nghal a ni.
Vohbik tan ID Card siamsak Vohbikte hriselna endik sak
