Mizoram Pradesh Congress Committee chuan Mizoram inthlanpui vote chhiar ni atan Pathianni ruat a ni chu an ngai thutak hle tih sawiin, MPCC President Lalsawta’n October ni 9, 2023 a vote thlak hun sawn tura Chief Election Commissioner Rajiv Kumar hnena lehkha a thawn chu tun thleng a chhanna an la hmuh loh avangin November ni 13, 2023 khan sawn tura ngenna an thawn nawn leh tih an sawi.
Election Commmision of India in Kohhran leh NGO te ngenna a ngaihpawimawh lo chu Mizote sentiment ngaihpawimawhlohna lian takah an ngai tih sawiin, Mizote rilru tihnat a pawi ti lo mai nilo in a tum lui tlat nia an ngaih thu an sawi a. Vote chhiar ni sawn chungchanga Mizo mipuite ngenna, Joint NGO leh MKHC te hialin ngenna an siam Election Commission in a ngaipawimawh duh loh laiin, Rajsthan Vote thlak ni Hindu te hun pawimawh anih avanga a sawn bik chu an ngai thutak hle tih sawi a. Vote chhiar ni dodal tumna hial awm ta chu pawi an tih thu sawiin, Election Commission chuan Mizoram vote chhiar ni sawn ngei se tih chu Congress party duhdan leh dinna a ni tih Mizoram mipuite hnenah an puang bawk.
MPCC President, Lalsawta chuan, “A hma a ka lehkha ang khan, Mizoram Inthlanpui vote chhiar ni chungchangah i ngaihhnathiamna ka rawn dil che a, December ni 3, Pathianni hi Mizo Mipuite’n Pathian ni atan kan serh ni, Pathian kan biak ni anih avangin vote chhir ni ruat a ni hi min sawn sak turin ka ngen a che.
“Vote chhiar ni ruat a nih danah hian State danga Election a nghawng theih avangin kan hrethiam a. Election Schedule in siam angin, Vote thlak hnuhnung ber tur Telengana State chuan Noveber ni 30 ah an thlak dawn a, Vote chhiar ni chu Satate 4 inthlanah hian Dercember ni 3, Pathianni ruat a ni a. I hnena ka ngen tawh angin, Mizoram hi State lian lo tak kan nih avangin, inthlan tihfel ni atan in ruat December ni 5 hma hian, Mizoram vote chhiar ni hi December ni 4 emaw, ni 5 ah pawh sawn nise kan intihfel vek hmanin a rinawm a ni.
“Mizoram vote chhiar ni sawn hian engmah nghawng pawi a neih dawnloh avangin min sawn sak hram turin ka han ngen nawn leh a che” tiin lehkha a thawn leh a ni.
Vote chhiar hun sawn turin ECI ngen nawn
