Mizorama MLA inthlana vote tla te chhiar hun atana Pathianni ruat a nih avangin political party pathum chuan a hran theuhin vote chhiar ni sawn turin Election Commission of India an ngen. Hetihlai hian Mizoram Kohhran Hruaitute Committee chuan Pathiannia vote chhiar tum thu hi chhanlet dan tur an rel dawn a, Central YMA pawhin ECI hnenah sawn tura ngenna a thlen dawn.
Rorel lai MNF chuan ECI-in Mizoram Legislative Assembly inthlan result chhiar hun atana Pathianni a ruat chu sawn a, a tuk Thawhtannia chhiar turin ziakin a ngen a. MNF Gen. Hqrs. thuchhuak chuan, ECI-in inthlan result chhiar ni atana Kristiante ni bik, Pathian biak inkhawm ni – December 3 a ruat chu tha a ti lo hle tih sawiin, Mizo Kristiante palzutnaah a ngai tih a sawi a. December 4 a sawn turin MNF president, chief minister Pu Zoramthanga rawtna angin chief election commissioner hnenah lehkha thehluh a ni tih a sawi.
Mizoram Pradesh Congress Committee president Lalsawta chuan chief election commissioner hnenah vek hian Mizorama MLA inthlan vote tla chhiar ni atana ruat December 3 chu Sunday a nih angin, Mizorama Kristiante ni serh, Pathian biak ni a nih avangin Congress party chauh ni lo, Mizoram puma Kristiante chuan he nia vote chhiar hi an duh lo tih a sawi. Hei vang hian vote chhiar hi Thawhtanni atanga Zirtawpni khawi emaw bera sawn turin a ngen tih ziakin a thlen a ni.
PC party pawhin thuchhuah siamin, ECI-in vote thlak ni atana November 7 a ruat chu tha an tih rualin, vote chhiar ni atana December 3 (Pathianni) ruat a ni erawh an pawm loa, Kristiante ni serh palzutnaah an ngai a; a rang thei ang bera vote chhiar ni atana ruat December 3 hi sawn turin ECI an ngen tih a sawi a ni.
Mizoram Kohhran Hruaitute Committee chairman, Synod moderator Rev Dr C Chawnghmingliana chuan vote chhiar ni atana Pathiannia ruat a ni chu tha an ti loa, zanin (October 10) hian MKHC chuan an sawiho dawn tih a sawi. Central YMA president R Lalngheta pawhin Pathiannia vote chhiar hi sawn turin ECI-ah ngenna an thehlut dawn tih a sawi bawk.
Vote chhiar ni sawn ngen
