Election Commission of India (ECI) in December 3 – Pathiannia vote chhiar hun atan a ruat avanga NGO Coordination Committee leh Mizoram Kohhran Hruaitute Committee chuan Kristian ni serha vote chhiar lo tura an ngenna a tihhlawhtlin avangin lawmthu an sawi.
NGO Coordination Committee chuan Kristiante ni serh humhalhna tura MKHC, MPF leh political party leh mi thahnemngaiten theihtawp an chhuahna ECI-in zahsak a, December 4 (Thawhtanni) a vote chhiar hun a sawn chu lawmawm a tih thu a sawi a. Vote chhiar hun sawn a nih theihnana an beihnaah Mizo mipui tanrualna a ropui takzet, tiin, Mizoram pumah MKHC kaihhruainaa kohhran ho tawngtaina Pathianin a chhang tih an sawi.
‘Mizo mipui chungah leh theihtawp chhuahtu pawl hrang hrang leh political party-te chungah lawmthu kan sawi a. Hun lokal zel turah pawh kan ram leh hnam, kan sakhua a him zel theihnan tangrual zel turin kan sawm a ni,’ NGOCC chuan a ti.
MKHC chairman, Synod moderator Rev Dr Chawnghmingliana pawhin inthlan vote chhiar hun sawn a ni chu Pathian hnena tawngtai chhanna a ni, tiin, Mizo mipui tawngtaina ECI kaltlangin Pathianin a chhang tih a sawi a ni.
Vote chhiar sawn vangin lawm
