Vote tlak thatna branch hnenah lawmman hlan

Serchhip District SVEEP nodal officer Lalnunmawii chuan an district chhunga hmeichhe vote thlak thatna MHIP Branch hnenah lawmman sumfai a hlan.
District Election Office Serchhip hnuaia SVEEP kaltlangin Serchhip district-a MHIP Branch hrang hrangten hmeichhe vote thlak an pun theihna turin hma an la a. DEO David Lalthantluanga leh Sub Hqrs. MHIP Serchhip general secretary Liantluangi ten kumin October 25 khan thawhhona thuthlung ziakin an district-a MHIP Branch hrang hrang tan inelna buatsaih a ni.
Pakhatna Neihloh Branch niin hmeichhe vote thlak zat 94.95% a ni a; pahnihna Buhkangkawn Branch (94.82%) leh pathumna Hriangtlang Branch (93.89%) a ni.
Pakhatna hian sumfai Rs. 10000 a keng a, pahnihna Rs 7000 leh pathumna in Rs. 5000 a ni. Heng bakah hian 90% chin chunglam hmeichhe vote thlakna Branch 14 awmin, special prize Rs. 5000 theuh siamsak an ni. 80% chin chunglam hmeichhe vote thlakna Branch 68 hnenah Rs. 1000 theuh hlan a ni bawk.
DEO Khawzawl leh Sub Hqrs YMA Khawzawl inremna thuthlung bawhzuiin 22-Tuichang Assembly constituency huamchhunga vote tlak thatna YMA Branch te hnenah pawh lawmman hlan a ni. YMA Branch hrang hrangin an chanchinbu leh aurinna hmangin vote thlak tura mipui ngenna an siam a, intlar ngai loa mipuiin vote an thlak theih nan branch tinin ruahmanna an siam bawk.
Khawzawl addl DC Lalfakzuala sawi danin, Tuichang bialah 2018 inthlanpuia vote tla (80.07%) aiin kumin inthlanpuia vote tla (84.49%) chu za zela 5-in a pung a. Tuichang biala polling party-ten an duty-na hmun tur an thlen kim hmasak ber thu te, inthlan zawhah pawh an thlen khawm kim leh hmasak ber thu leh Mizorama vote chhiar zo hmasa ber bial an nih thu a sawi bawk.
Vote tlak thatna YMA branch chu: 1-na Hmuncheng Branch (Rs. 12000), 2-na Tlangmawi Branch (Rs. 7000), 3-na Arro Branch (Rs. 5000) a ni a. YMA Branch pasarih – Lungtan, Khualen, Vangtlang, Chawngtlai, Chawngtlai Phaiveng, Riangtlei leh Khawzawl Darngawn hnenah consolation prize Rs. 1500 theuh hlan a ni.