Vun nalh nan tomato
Tomato hi chu chhungtin choka-ah hmuh tur a awm deuh fur awm e, mahse, cosmetic lama a tangkaina leh thatna erawh kan hre tam lo khawp mai. Vun kaw zau tih tet nen a tha a, arngeng damdawi atan an hmang a, vun tihmam nan an hmang a, sunburn enkawl nan an hmang a, vun tilang thar tu a ni e an ti leh zel.
Tomato-ah hian lycopene a tam hle niin an sawi a, chu chu antioxidant a ni a, vun chhunglam atangin sunscreen angin a rawn thawk thei niin TOI chuan a tarlang. Heng antioxidant vang hian tomato chu mi tilang naupangtu (anti-aging product) tha tak a ni a, cell chhe tur vengin vun ro tur a veng bawk niin an sawi.
Mithiamte chuan nitin lycopene 16 milligrams tal ei ziah a tha niin an sawi a, chu chuan kan taksaa free radicals a titlem a (free radicals atoms unpaired electrons pakhat emaw a aia tam emaw pai a ni a, chu chu min ti lang upatu, lung natna thlentu leh cancer thenkhat pawh thlen theitu a ni), taksa a moisture awm kalral mai tur a veng thei bawk a ni.
TOI chuan vun hrisel tak nei turin heng te hi zawm la, cheng tam tak senga cosmetic treatment lak i pumpelh thei dawn niin an sawi a, lo ti ve chhin ta che.
1. Vun kaw zau tih zim nan a hmantlak hle. Vun kaw zauah chuan bawlhhlawh leh thil dang a tling khawm hma bik a, infection a awm hma bik a ni. Tomato tui sawr tharlam tak chaweinaa fian hman thin khat-ah lime juice (ser tui) far li vel far la, chawhpawlh rawh. Chu chu i hmaiah hnawih la, a bial zawngin (circular motion) dim tein nuai la, minute 15 vel i chiah hnuah tui vawtin i phih fai leh mai dawn nia. Chutianga regular taka tih chuan vun kua a tizim thei a ni.
2. Arngeng nei chuan kan buaipui hle thin. Tomato-a thil thur awm hi arngeng damdawi tha tak niin an sawi a. Arngeng damdawi-ah reng reng vitamin A leh C a awm deuh vek a, tomato pawhin vitamin A leh C bakah K te a pai hnem hle a ni. Arngeng nasa vak lo a nih chuan tomato chu a lai takah phel a, a chhung lam chu i hmai hnaihah hmang rawh. Arngeng nasa tak a nih chuan tomato chu rawt sawmin face pack anga hmangin i hmaiah hnawih la, darkar khat vel i chiah hnuah phih fai leh ang che. Nikhata vawi thum emaw a aia tam emaw pawh tih a pawi lo.
3. Vun mawm chi tan pawh tomato chu a tha lehzel. Tomato tui chu sawr la, fanghma tui tlem sawr leh la, chawhpawlh rawh la cotton ball-in nitin hnawih rawh. Hei hian vun mawm nasa lutuk tur a veng a, arngeng tan pawh a tha.
4. Tomato leh avocado chawhpawlh hi vun tan a tha hle. Tomato astringent tha tak a ni a, blackhead (vuna dum awm thin) leh mawm ti tlemtu tha tak a ni a, avocado chu antiseptic leh moisturing effect nei a ni ve thung. Tomato leh avocado rawt sawm chawhpawlh chuan Vitamin A, C leh E te an pai tam avangin vun a tifai tha a, a mawm tur a veng a, moisture a siam thung. Minute 20-30 vel chiah la, tui lum pep pepin i phih fai leh mai dawn nia.
5. Tomato chu sunburn tan damdawi tha tak a ni. Tomato chu a laiah phelin rawt sawm la, yogurt thirfiante hnih nen chawhpawlh la, chu chu i hmai, nghawng, kut leh ke-ah te hnawih la, minute 20 vel i chiah hnuah tui vawta tihfai leh mai tur a ni.
6. Vun êng, hrisel hmel tak mai neih i duh chuan tomato a tha. Tomato juice chu khawizu nen chawhpawlh la, a kawihlarh thlengin chawk rawh. Chu chu i vunah hnawih la, minute 15 vel i chiah hnuah tui vawtin i sil fai leh mai dawn nia. I vun a lo nemin a mam sawt ang a, a êng sawt bawk ang
Vun nalh nan tomato
