Vungzagin Valte, MLA boral

Manipur-a Zo hnahthlakte hruaitu pawimawh pakhat Vungzagin Valte, MLA chu February ni 20 tlaiah khan a boral.
Vungzagin hi Manipur-a Zo hnahthlakte leh Meitei inkar a that loh vanga Meitei kut tuar, Delhi-a enkawl a ni a, hun engemaw chen enkawl a nih hnuah a chawl ta a ni.
Zo hnahthlakte leh Meitei inbeih vanglaia hliam tuar a ni a, Imphal-a chief minister N Biren Singh hova an thukhawm zo, a chenna hmun pana a haw kawngah 2023 May ni 4-ah beih niin, hliam na tak a tuar a ni.
Delhi-ah kum hnih dawn enkawl a nih hnuin nikum April ni 18 khan Churachandpur-ah a haw a, an inah hian enkawl zui zel a ni. A hniam leh tak avangin February ni 8-ah khan Delhi panpui leh a ni a, theihtawp chhuaha enkawl a ni chungin chhan theih a ni ta lo.
Churachandpur-a phum tur a ni a, Chawlhni tlaiah khan Delhi atangin Lengpui Airport thlenpui niin, Bawngkawn South YMA Hall-ah thlahna hun hman a ni a, Central YMA leh mi hrang hrangin pangpar an dah. Heta tang hian zanah motor-in Churachandpur panpui a ni.
1964-a piang a ni a, Pherzawl district-a Thanlon bialah 2022 inthlanpuiah BJP ticket-in thlan tlin a ni. He bialah hian a hmain Congress ticket-in vawi thum a lo tling tawh bawk.