War cabinet minister-in PM Benjamin Netanyahu a vau

Israeli war cabinet minister Benny Grantz chuan Prime Minister Benjamin Netanyahu-an Gaza Strip a post-war plan a siam lo a nih chuan banah a vau.
Gantz chuan 8 June deadline siamin chumi chhung chuan ‘strategic goal’ paruk tihhlawhtlin vek tur a ti a. Chung zingah chuan Gaza a Hamas rorelna tihtawp te, multinational civilian administration din te pawh a tel.
“Mimal aia ram i dah pawimawh zawk chhung chuan harsatnaah pawh kan thlawp tlat ang che” tiin a sawi a, “Mahse mi chhaw te kawng i zawha hremhmuna ram pum min luhpui i tum chuan sorkar hi kan chhuahsan ang” tiin Gantz chuan a sawi a.
Netanyahu thung chuan Gant thusawi chu sawisel let nghalin ‘Israel hneha a awmna tur’ a ti thung.
Hetih lai hian Gaza Strip ah inbeihna a nasa tial tial a, Israeli sipaite chuan southern city Rafah leh northern town Jabalia, Gaza a refugee camp hmunpui leh a hmaa Israel-in Hamas fighter te a tukzal tawhna a tihah chuan inbeihna a nasa hle a ni.
Gantz thusawi hma lawk hian war cabinet member tho leh Defence Minister Yoav Gallant chuan netanyahu chu mipui vantlang hriatah Israel chuan Gaz civilian leh military rule kalpui a tum lo tih sawi turin a lo titawh bawk a.
Gallant chuan tum tam tak he issue hi a sawi lan tawh thu sawiin mahse chhanna a dawng ngai lo tiin a sawi bawk.
Gallant leh Gantz te chuan Gaza military hmanga thunun chuan Israel security a tibawrhbang nasa thei zawk an ti a. Chutihlaiin Netanyahu a ruling coalition a tel far-right member te chuan Hamas te hneh tak tak tur chuan Gaza thunun chu ngaiah an ngai thung.
Gantz chuan Netanyahu chu ‘Israel mipui ten an thlir reng che’ tia hrilhin, “Zionism nge lunghnurna, lungrualna nge inthendarhna, mawhphurhna nge dan mumal awmlohna, hnehna nge chhiat i thlan dawn,” tiin a sawi.
Strategic goal paruk tihhlawhtlin tur a tih zingah Hamas tena Gaza-a Israeli leh foreigner an la hren te lak let vek te, northern Gaza a Palestinian civilians tlanchhiate 1 September hmaa let lehtir vek te pawh a tel a.
Hei bakah hian Israel chuan ‘Iran leh a allies te dodal tura free world leh Khawthlang ram te nena alliance siam’ pangngai taka kalpui a nih zui zel theih nan Saudi Arabia nena inbiakna neih ni se a ti bawk.
Netanyahu chuan Gantz demand te tihhlawhtlin a nih chuan ‘indona a tawp ang a, Israel chu hnehin a awm bawk ang a, mitang te thlauhthlakin an awm ang a, Hamas te tinghetin Palestinian state a piang ang’ tiin a sawi ve thung.
Israel war cabinet hi Hamas tena nikum 7 October a Israel beia mi 1,2000 chuang tihluma mi tam tak lung in tang tura an hruai hnua din a ni.
Gaza-a Israel-in Hamas te chhutchimih nana beihpui a thlak avangin nunna chan 35,386 an awm tawh tiin Hamas-run health ministry chuan a tarlang.
Hetih lai hian Israel chief of staff Herzi Haveli pawhin Netanyahu chu strategy thar an mamawh tiin a hrilh niin Israeli media te chuan an tarlang.
Northern Gaza a Jabalia te ang chu a hmaa Israel-in Hamas te an nuaichimih tawhna tia a sawi zinga tel niin tuna a bei leh bawk si chuan sorkar in Hamas te nuaichimih nana strategy a kalpuiah felhlel a awm tia sawi a ni.
Haveli chuan Hamas te ni lo Gaza a sorkar kalpui tur mumal an awm lo a nih chuan Hamas te a khat tawka tihchhiat reng nan sipaite chuan military campaign neih chamchi a ngai dawn tiin a hrilh tia sawi a ni bawk.
Gantz thung chuan Gaza a civilian sorkar a awm theih nan American, European, Arab leh Palestinian administration te chuan sorkar mumal a awm theih hma chuan rorelna lekkawh se a ti thung a. Israel chuan chutih chhung chuan security lam a pe thung ang a ti bawk.