World Cup 2026-ah Mexico chuan an ram aiawh turin kum 11 leh ni 240-a upa Gilberto Mora an ko tel a. Mora hi World Cup 2026-a player naupang ber a ni dawn.
World Cup 2026-ah hian ram hrang hrang 48 an tel dawn a, player zawng zawng hi 1,248 an ni dawn tihna a ni. Player 1,248 zet zingah hian rawlthar (teenagers) 22 an tel dawn. Rawlthar 22 zingah chuan inelna thlengtu pakhat Mexico player Gilberto Mora a naupang ber dawn.
World Cup ah hian rawlthar player duhawm tak tak an lo inlan tawh thin. Kum 1958 khan kum 17 mi ni chungin Pele a langsar viau a, Brazil a champion pui. Kum 2018 khan kum 19 mi Kylian Mbappe chuan France a lo champion pui tawh bawk. World Cup 1998 a France an champion tum khan England rawlthar Michael Owen a lo langsar viau tawh bawk.
World Cup 2026-ah pawh hian rawlthar duhawm tak tak an inlan leh dawn a, chung zingah chuan kum 18 mi Lamine Yamal a langsar viau dawn a. Yamal-a’n Spain tana a khelhpui Pau Cubarsí pawh a hmuhnawm a rinawm. Anni bakah hian Germany in an koh tel kum 18 mi Lennart Karl te, Warren Zaïre-Emery, Désiré Doué, Nico O’Reilly, Arda Güler leh Nico Paz te pawh rawlthar langsar zual zingah an tel ang.
World Cup 2026 a player naupang ber tur Gilberto Mora hian mualchhung a lut a nih chuan Mexico tan World Cup khel thei naupang ber record thar a siam ang. Mexico tan hian Gold Cup, 2025 khan bul a lo tan tawh a, Mexico tana bul tan thei naupang ber a lo ni tawh nghe nghe a ni.
World Cup 2026 a player naupang ber Mora a nih lai hian kum 43 leh ni 162 a upa Scotland goalkeeper Craig Gordon chu player upa ber a ni ve dawn thung a. Player upa ber leh naupang ber kum inthlauhna hi kum 26 zet a ni. WC 26 player upa zual zingah kum 41 mi Portugal captain Cristiano Ronaldo a tel.
WC 26 hi player 357 zet tan an hun hnuhnung a ni dawn a. Hetihlai hian player 891 zet tan an bul tanna tur a ni ve thung dawn.
Player zingah Lionel Messi leh Cristiano Ronaldo te chu World Cup vawi ruk khel thei awmchhun an ni dawn a. Coach lamah chuan Ghana coach Carlos Queiroz chu World Cup-ah a zawna vawi nga team kaihruai thei pahnihna niin, Bora Milutinovic (1986-2002) hnung a zui dawn. Manchester United manager Queiroz hian World Cup-ah Portugal (2010) leh Iran (2014, 2018 & 2022) khan a lo kaihruai tawh a, WC 26-ah hian Ghana a kaihruai leh dawn.
WC 2026 a player naupang ber Mora
