2010 World Cup final hnu lama World Cup knockout stage-a chak ni hmel hmu leh ngai ta lo Spain chuan Zirtawpni zan last 32 inkhelah si thum faiin Austria an sawp a, a thiam zual 16-te inbeih chhunzawm lehna turah an tiatpui tura ngaih Portugal an hmachhawn zui leh ang.
Los Angeles Stadium chhunga mipui 70,492 tehreng pungkhawm hmaah ball chang tam zawk chungin Spain-in goal an khung mai thei lo a, he stage-a an mangchhia bawk kha an kaichhuak leh mai ang em tia Spanish fans an thawk dep dep laiin chawlhlawk hnaih tawh lam minute 36-ah Mikel Oyarzabal chuan he inkhela a goal hmasa zawk leh sikhat faia Spain hmahruaina goal a khung a, veng khatin thaw a veng phawt!
Second half tir lam minute 66-ah Alex Baena thawhrah atangin Pedro Porro chuan Spain goal hnihna a thawh ve leh a; heti chinah hian duhtawk ngah mai loin hun pangngai tawp dawn tepah Oyarzabal bawkin a goal hmasa zawk siamsaktu Marc Cucurella ball pek tho hmangin sithum faia Spain chakna goal a tilut leh a, 2026 tournament kal mekah La Liga club Real Sociedad captain hian goal li a khawl tling ve ta a ni.
Spain goalkeeper Unai Simon chuan a zanwin game li chhung goal a chhuah lo tling ta a, Austria lakah pawh khan hlauhawm hmachhawn tur a nei bar lo.
Spaniard rawlthar kum 18 mi Lamine Yamal hmuhnawm leh viau mah se goal thun zo lo zawngin a khawsa leh tlat a, hun tawp hmain lak chhuah a ni zui nghe nghe!
Tun kha kum 16 chhunga men’s World Cup knockout match bika Spain chak vawi khatna niin, Austria tan ve thung kum 1954 hnu lama World Cup knockout game an khelh vawi khatna a ni.
2010 final hnua World Cup team naran ni chho ta tlat Spain hi kum 2014 khan group stage paltlang zo loin an tla thum tawk a; kum 2018-ah penalty shootout kaltlangin a thlengtu Russia-in last 16 atangin an petchhuak a; kum 2022 khan round of 16 penalty-ah bawk Morocco hneh loin an tlawm leh bawk.
WC knockout game-ah Spain chak ve ta hram!
