White House-ah Trump leh Syrian president inbe dawn

White House-ah Trump leh Syrian president inbe dawn
US President Donald Trump-a chuan Thawhtanni hian Syrian President Ahmed al-Sharaa-a chu White House-ah a kawm dawn niin press secretary Karoline Leavitt-i’n a sawi.
Devember thlaa Bashar al-Assad-a thuneihna a chhuhsak hnuah al-Sharaa-a hian ram dang a tlawh kual nasa hle a. Assad-a rorel chhunga ram dang sorkar leh Syria inkar chhe tawh tak khan siam thaa khawvel ram lian hruaitute kawmngeiha inthlunzawm leh dan tur tumin a kawm kual nasa hle a ni.
Trump-a pawh hian al-Sharaa-a hi kawmngeih a duh hle nia ngaih a ni a. June thlaah khan US-in Syria a hrekna pawh a lo hlip tawh a, a hma chiah thla, May-ah Saudi Arabia a tlawh tumin Syrian hruaitu nen hian an inkawm bawk.
Leavitt-i chuan Thawhlehni zan (India-a Nilaini chawhma)-a thuthar lakhawmtute a kawmnaah al-Sharaa-a’n White House a tlawh tur hi a puang.
“President-in Middle East a tlawh tum khan thutlukna lian tak siamin muanna an neih theih nan remchang tha tak siamsakin Syria hrekna hlih a nih tur thu a puang a. Tuna an sorkar mek pawh hian hei hi remchangah hmangin hma lam pana inthian thatna siam ngei an tum niin ka hria,” a ti.
Tun hi al-Sharaa-a’n Washington a tlawh hmasak ber tur a nih laiin US erawh September thlaa UN tawh khawm khan a lo tlawh tawh a, jihadist thin hi kum tam tak chhunga New York-a UN General Assembly-a Syrian president zinga thu sawi leh hmasa ber a ni nghe nghe.
Syria palai lawk, Asaad al-Shaibani-a chuan kar hmasa khan al-Sharaa-a hian Washington a tlawh tur thu hi a lo sawi tawh a, hrekna hlihsak kalpui zel dan tur te, an ram tun din dan tur leh firfiak beih dan turte an sawi dawn niin a lo sawi tawh bawk.
Inrinni khan Syria-a US palai, Tom Barrack-a pawhin -al-Sharaa-a hian Washington a tlawh thuai tur thu leh US kaihhruaia Islamic State (IS) firfiak pawl beitu zinga tel tura inremna an siam pawh a beisei tih a lo sawi ve tawh bawk.
al-Qaeda-a inziak lut thin, al-Sharaa-a kaihhruai pawl, Hayat Tahrir al-Sham (HTS) hi July thla khan Washington chuan firfiak pawla a dah thin atangin a lo paih tawh a. Nikum kum tawpa thuneihna an chan hnuah tun hmaa rawng tak taka an chetna titawpin ram dang nena inkawmngeih tumin hma a la nasa hle a ni.