Wimbledon lalnu thar Noskova
Wimbledon women’s singles final-a a vawi khatna atan Inrinni zanah Czech player ve ve intumin, 6-2 5-7 6-3 hnehna nen Linda Noskova chuan a thiannu Karolina Muchova hnehin Wimbledon title a hlawhchhuak.
Kum 21 mi Noskova khan 6-2 5-2-a hma a hruai hnuah dan pangngaiin a chak tlang leh dawn a nih hi tih ngaihdan piang hman mah se 10th seed Muchova chuan a zawn zatin game a nga a rawn la zui ta mai a, decider an khelh zui a ngai a, tah chuan Wimbledon lalnu thar ni turin Noskova a chak zui ta tho a ni.
Hnehna a chan zawhah Noskova chuan an match khelh chu taksa leh rilru lam thlenga hautak lutuk a nih thu sawi chungin point hnuhnungber hmuh hautakzia hahipin a sawi a; ninth seed Muchova lam hawi zui nghalin:
“Nang nen ber khera ka major final hmasaber kan khel dun thei hi ka hlim a, nangmah avangin tough lo thei lo dinhmunah ka ding a, history kan sim dunin ka hria,” a ti.
Noskova hian a hnehna ropui sualchhuah chu kum hnih kaltaa Wombledon khelh dawn tepa thi ta a nu Ivana telin a chhungte tan a hlan a; a inkhel lai a hmuna tawiawmtu a pa chungah lawmthu sawi nghalin, mittui nen a nu hming a lam chhuak bawk a, “Ka nu kha awm lo se dinhmun hi ka thleng lul lo ang,” a ti.
Noskova hian van lam hawiin flying kiss a thawn chho a, Centre Court mipui 15,000 zetin standing ovation nen an lo thlawp ve bawk.
2023 French Open runner-up Muchova kha tunhma lama major final tawnhriat lo nei tawh ni mah se a nervous zawkah a tang a, chak lo zawkah tang zui ta rengin, inkhelh banah a kawppui Noskova erawh a lawmpui thiam hle.
Noskova hi kum li chhunga All England Club-a Czech player champion thei pathumna niin, a chipui pahnih Marketa Vondrousova (2023) leh Barbora Krejcikova (2024)-ta hnung a dawl tha hle a ni.
Inrinni final kha a hmunah vawi kua ngawt Wimbledon singles champion lo ni ve tawh Czech-born Martina Navratilova bakah he hmuna kum 2011 leh 2014 champion Petra Kvitova-te paw’n an thlir.
Navratilova hian kum 1978 leh 1979 khan Czech ni chungin Wimbledon title pahnih a la zet a, US citizen a nih hnuah American nihna thar nen grasscourt Grand Slam title hi pasarih dang a lak belh leh a ni!
A career-a Grand Slam final a khelh vawi khatnaah Linda Noskova a champion nghal a, Venus Rosewater Dish a dawn rualin Noskova khan prize money-ah pound maktaduai 3.6 tehreng hui tling bawkin, zan khat thil thuah a millionaire hneh kher mai a; world ranking lamah pawh invawrh dawrhin, a career-a a tawnsan ber hun ni turin tukin WTA ranking tharah pasarihna a luah chho.
Wimbledon champion thar bihchianna
Kum 2011 champion Petra Kvitova hnu lama Wimbledon title la thei naupang ber Linda Noskova hi Czech Republic mi niin, a champion lai khan WTA ranking-ah 12-na a ni.
Noskova hian kum 2020 khan a WTA qualifying debut hmasaber chu Prague khawpuiah tanin, 2021 French Open girls’ singles title a lak bakah kha mi season-a a win-loss record chu 38-9 niin, ITF Circuit title pali a la.
Kum 2022 a herchhuah chuan ITF circuit-ah a professional career bul tanin, he mi kum hian title paruk a la hman bawk.
August 1, 2022-ah Prague khawpuia semi-final a thlen hmangin top 100 huang a lut a, Coco Gauff record khumin he huanga lang pha player naupang ber a ni.
2023 season-ah invawrhsang zelin, Adelaide 1-ah qualifier ni chungin runner-up a ni a, final-a a hneh loh kha Aryna Sabalenka niin, Prague tournament lianah pawh final-ah Nao Hibino a hneh lo leh bawk.
He mi kum vek hian Lyon-ah quarter-final thlengin, Indian Wells leh Cincinnati lamah third round a thleng a, October 9, 2023-ah chuan top 40 a luah pha der tawh!
2024 Australian Open-ah chuan Noskova hian a Grand Slam quarter-final hmasaber khelin, he thum thleng tur hian third round-ah world number one Iga Swiatek a hneh a, semi-final luh inchuh lamah Dayana Yastremska a hneh ta lo a ni.
He mi kum vek hian Monterrey-ah a WTA singles title hmasaber hlawhchhuakin, final-ah Lulu Sun a hneh a; Prague leh Brisbane-ah semi-final alut bawk.
Kum 2025-ah chuan tour final vawi thum ngawt a lut ta a, a WTA 1000 final hmasaber chu Beijing khuaah khelin, Amanda Anisimova a hneh lo a; Prague leh Tokyo khaw final-ah tlawm bawkin, a top 20 debut a nghakchhuak a, season a tawp meuh chuan a career-a a tawnsan ber hun tawngin No. 13n nihna nen kum a khar.
Inrinni hnehna kha a career-a Noskova WTA singles final khelh vawi riatna a tling ve tawh.
Noskova hi kum 2020 hnu lama Wimbledon bik kaltlanga Grand Slam singles final hmasaber khel player palina niin, midangte chu – Elena Rybakina, Ons Jabeur leh Amanda Anisimova-te an ni.
All England Club-a final a luhna kawng thlirlet ila.
First round : beat Ella Seide 6-4 6-3
Second round : beat Camila Osorio 6-3, 4-6, 6-2
Third round : beat Sorana Cirstea 6-2, 3-6, 7-6 (9)
Fourth round : beat Madison Keys 6-4, 7-6 (2)
Quarter-final : beat Elise Mertens 6-3, 7-5
Semi-final : beat Marta Kostyuk 6-4, 6-4