Ni hnih thanga Mizoram sawrkar pawimawh kaihhnawih Shillong-a zin adviser to chief minister (Handholding) Dr KC Lalmalsawmzauva chuan sawrkar hmalakna hrang hrang atana mi pawimawh a kawm.
October 21 & 22 khan Institute of Hotel Management (IHM) Shillong tlawhin, Mizorama wine industry tihhmasawnna atana tangkai tur a sawipui. IHM Shillong director Dr Balabynta Kharshiing leh faculty-ten lo dawngsawngin, Mizo thalai tam zawkin hotel management an zir theih dan tur an sawi a. IHM campus-a North East Wine Incubation Centre an tlawhnaah Mizo loneitute tharchhuah thlai atanga wine quality tha siam a nih ve theihnan training pek dan tur an sawiho bawk.
Indian Institute of Management Shillong a tlawhnaah Dr KC Lalmalsawmzauva hian Mizoram sawrkarin Bana Kaih Scheme a kalpuia thlai thlan bik hralh dan tihchangtlunna tur an sawi a. IIM Shillong director Dr Naliniprava Tripathy chuan Mizoram sawrkar hnenah a hma thei ang bera an project siam an lo thehluh tur thu a hrilh.
North Eastern Council secretary Satinder Kumar Bhalla leh North East Center for Technology Application and Reach (NECTAR) director general Dr Arun Kumar Sarma pawh hmu in, Mizoram sawrkarin thlai thar sawngbawl kawnga a mamawh thenkhat phuhruk tura ruahmanna kal mek a bawhzui a. NEC leh NECTAR hnuaia sawhthing sawngbawlna project thehluh tawh an bawhzui dan enpuiin, an ni lam chuan theihtawp an lo chhuah mek tih an lo hrilh a ni.
Adviser to CM hian Meghalaya Agriculture & Farmers’ Welfare minister Timothy D Shira a kawmnaah state pahnihin thlai thar hralhna an buaipui dan sawidunin hmasawnna awm thei turah a theih anga thawh dun zel an rel.
Wine siam zirtir dan tur sawipui
