Wolves atangin Lopetegui a chhuak
Premier League season thar tan a ni dawn ruai tawh a. Club hrang hrangten tha zawka inlan tumin an hmanhlel a. Manager thar an lak luh a, player thar an neih chur chur laiin Wolves erawh chuan manager thar an zawn leh lai lawk a ngai a. An manager rawih mek Julen Lopetegui chuan a hna a bansan.
Spanish journalist Guillem Balague tarlan dangin Wolves hian nipui bazar inhawng mekah an manager Lopetegui hi player thar lak an phalsak lo. A duh anga an squad a thuamchak ve theih loh lai hian an captain Ruben Neves chu Saudi Arabian club Al-Hilal-ah an £47m in an hralh a. Neves hi an player hralh to ber a ni nghe nghe. Neves bakah hian Mexican striker Raul Jimenez pawh Fulham zawm phalsak a ni bawk. An player tha hralh chunga player thar an lak luh theih si loh vangin manager Lopetegui hi a lung ni lova, chhuah a duh ta a ni.
Nipui bazara an chet hmang vanga manager Lopetegui-a’n chhuah a duh tih an hriat hnuin Wolves hian an manager thar tur an dap zui nghal a. Bournemouth manager hlui Gary O’Neil chu an manager thar ni tura rinkai ber a ni nghal a, an inlak luh thuai rin a ni. Wolves manager thar ni tura ngaih O’Neil hian season liam ta khan Bournemouth chu 15-na nihpuiin Premier League-ah a inhamtan pui a. Season tharah tha zawka inlan tumin ruahmanna nei bawk mah se June thla khan ban a ni ta zawk. Club enkawl nei lova awm mek a nih vangin Wolves nen hian an indawr fel thuai tura ngaih a ni. Wolves hian EPL season thara an game hmasa berah Manchester United chu thawhtan zanah an hmachhawn ang.
Wolves manager hlui ni ta Julen Lopetegui hian Spain national team leh Real Madrid pawh a lo enkawl tawh a. Wolves a enkawl hma hian Sevilla chu European title a lo lakpui tawh bawk. Manager tawnhriat ngah tak a nih vangin team enkawl a neih leh thuai rin a ni.
Wolves atangin Lopetegui a chhuak
