HIV/AIDS avanga naupang chanhaite enkawlna Gan Sabra chuan Nilain khan Aizawlah World AIDS Orphans Day an hmang a, adviser to chief minister (Finance) TBC Lalvenchhunga’n a hmanpui.
HIV/AIDS avanga naupang chanhaite Ni-ah hian Mizoram State Child Protection hotute, HIV/AIDS kaite enkawlna lama hmalatu tlawmngai pawl hrang hrang, home hrang hranga thawktute leh HIV/AIDS avanga harsatna tawk mi engemawzat an tel.
World AIDS Orphans Day puala hun buatsaihtu Gan Sabra hi kum 2006-a din niin, HIV/AIDS avanga naupang chanhai leh harsatna tawkte enkawlna hmun a ni a. HIV/AIDS avanga harsatna tawk naupang 40 an enkawl mek. Naupang an enkawl tawh zingah hnathawka mahni intodelh, nursing zir mek leh zir chhuak tawhte pawh an awm a ni.
Gan Sabra hian Community Support and Sponsorship Programme an kalpui bawk a. Sponsorship kaltlangin Aizawl, Lunglei, Champhai, Mamit, Kolasib, Serchhip leh Saitual district-ah HIV/AIDS avanga harsatna tawk naupang 264 leh chhungkua 118 tan tanpuina pe in an tlawhkual thin. Thlatin an zirna senso, ei leh in bakah damdawia inenkawlna an tumsak bawk.
Heng bakah hian Anti-Retroviral Therapy (ART) damdawi an semchhuak thin a, HIV/AIDS avanga nausen harsatna tawkte tan hnute tui (Formula Milk) an pe thin a ni.
World AIDS Orphans Day
