World Athletics result hrang hrang bihchianna

World Athletics result hrang hrang bihchianna
Budapest-a World A-thletics Championships 2023 kal mekah Nilaini khan Dominican Republic tlan chak Marileidy Pau-lino chu women’s 400m intlansiak final-ah a chak ber a, Dominican hmei-chhiate zinga world cham-pion hmasaber a ni.
Kum 26 mi Paulino hian nikum worlds leh Tokyo Olympics-ah silver medal awrhin, kumin World Championship-ah lawmman semna dawhsan chungnungber a luah ve ta nge nge a ni.
Inhliam American 400m hurdles world record holder Sydney McLaugh-lin-Levrone a inlan theih loh bakah fa a hrin avangin Olympic leh defending world champion Shaunae Miller-Uibo a tel theih loh bawk avangin women’s 400m title hi zau zawkin a inhawng a, rinkai pahnih elpui tur awm tak loh hlawkpuiin Paulino chuan Dominican female world champion hmasaber nihna a chan phah tiin a sawi theih ang.
Paulino hian second 48.76 chhungin tlankawng a zawh tawp a, gold medal a awrh rualin an ram national record thar a siam zui nghal.
Poland nula Natalia Kaczmarek (49.57 secs.) chuan silver dawngin, tun hi Poland-in 400m intlansiaka world championships medal an lak tumn khatna a ni nghal.
Pathumna chu nikuma bronze bawk lo awrh tawh Sada Williams of Barbados (49.60) a ni leh.
400-hurdles hnehtu Warholm bawk
Norway athlete Karsten Warholm chuan Nilaini khan 400-metres hurdles gold awrhin, World Athletics Championships 400-metres hurdles-a vawithum a chakna a ni tawh.
World record holder leh Olympic champion ni bawk Warholm hian tlankawng hi second 46.89 chhungin a zo a, kum 2017 leh 2019 world championships ang bawkin lawmman semna dawhsan chungber a luah.
Kum 27-a upa Warholm hi season liamta worlds-ah talbuaiin pasarihna a ni pha chauh a, kha erawh chawn tha nain a tihbuai vang a ni pakhat.
400-metres hurdles-ah hian Kyron McMaster (47.34 ) chuan silver awrhin, British Virgin Islands tana world championships medal hmasaber a ni.
Nikum Eugene worlds leh Tokyo Olympic-a silver medallist ni ve ve thei American Rai Benjamin (47.56) chuan bronze a awrh ve thung.
Briton Kerr kutah 1,500m gold
World Championships kal laia beiseiloh result lantirin Josh Kerr chuan men’s 1500m race-ah gold medal a awrh nawlh a, he dinhmun luah tur hian Olympic champion leh rinkai ni bawk Jakob Ingebrigtsen a hmakhalh.
Nikum pawh khan Norway mi Ingebrigtsen hi 1,500m gold awrh pha loin Briton Jake Wightman chuan a lo thlenkhalh tawh a, kuminah Tokyo Olym-pic bronze medallist Kerr lakah a tlawm zui leh a ni.
Kerr hian minute 3:29.38 hun hmangin gold a awrh a; nikum world championship ang bawka silver medal chang leh Ingebrigtsen hian minute 3:29.65 hmangin, chawlhkar nga kalta mai kha chuan Poland ram intlansiakah 1,500m tlanna’n minute 3:27.14 chhung hun a hmang a, kha result avang khan he intlansiak history-a tlanchak palina niin, Budapest-ah an ram lama a tlan fuh kha a pha ta lo a ni.
Bronze medal chu Norwegian Narve Gilje Nordas (3:29.68) kutah a lut ve thung.
Pole vault gold medal
Nilainia mite rilru khawihtu lian pakhat chu Katie Moon leh Nina Kennedy-te’n pole vault gold medal an changdun kha a ni.
American Moon leh Australian Kennedy-te hian metre 4.90-a sang kham an hlen ve ve hnuah a aia sanga an kham 4.95m chu vawithum zuanah an khum zo lo ve ve a, chak zawk tur zawnna chi dang jump-off (sudden death competition) hmanga la zuang chhunzawm thei an nih laiin gold insem an thlang ta zawk a; BBC TV thupuangtu Dame Jessica Ennis-Hill chuan an thiltih dan kha fakin, “Kha thil kha a mawihnai takzet a, kan sports nihna dik tak an pholang a ni,” a ti.
A hun an sawn tlai tak 2020 Tokyo Olympics-ah pawh khan Qatar mi Mutaz Essa Barshim leh Italy infiammi Gianmarco Tamberi-te pawhin tuntum ang bawk hian high jump gold an lo awrhdun ve tawh bawk.
Ningania boruak lum uap churh hnuaiah Moon leh Kennedy-te chuan intihsiak an kalpui chhunzawm dan tur an sawidun zawk a, reilote hnuah thlukna siamin an inkuah a, gold insem an remti ta a ni.
Bronze medallist chu Finland vaulter Wilma Murto a ni ve thung.
Tarlan tak angin, jump-off an tih chu sudden death competition niin, vaulter pahnih zuan theih chin a intluk hnu, phak loh chin inang an neih hnuah kham (bar) chu chhe tein an hniam hret ang a, chu chu an zuan leh ve ve ang a, an pha ve ve a nih chuan chhe te bawkin an san leh ang a, chu chu an han zuan leh ang a, hetianga an tiha a pha lo zawk zawk hi chak lo zawkah an puang mai thin.
History siamtu Parul
World Athletics Championships kal laiah hian Nilaini khan Parul Chaudhary chuan 3000m steeplechase heat race-ah amah rau raua a chetthat ber hun tawngin minute kua leh second 24.29 hmangin pangana a luah a, Indian female athlete zinga track event-a final thleng thei pahnihna a ni.
Heat pathuma top five finisher theuhte chu final round-a tlan turin an qualify thin a, kum 28 mi Chaudhary hi a tawpa medal inchuh tur mi panga zingah telin, a hmaa India hmeichhiate zinga hetiang dinhmun lo thleng ve tawh chu Lalita Babar chiah niin, 2015 World Athletics Championships-ah khan final round a thleng a, pariatna niin, tun thleng hian women’s 3000m steeplechase national record (9:19.76) kawltu a la ni nghe nghe.
Nilaini vek khan national record holder long jumper Jeswin Aldrin pawhin a career-a a vawikhatna atan World Championships final a lut a; a chipui Murali Sreeshankar erawh thung chuan season kal laia a zuan chhiatber hun tawngbuain qualification round a paltlang zo lo thung.
Kum 21 mi Aldrin-a hian kumin March thla mai khan metre 8.42 zuangin national record thar a siam a; Budapest lamah pawh inrintawkna sang zawk nen intihsiak hmachhawnin, Nilainia a first attempt-ah 8.0m clear nghal mah se a zuan hnuhnung pahnihah a foul ve ve ta tlat a, chuti chungin 12-man final zingah tel pha thoin, nizana a final result tarlan hman a ni ta lo.
Javelin throw-a national record holder ve bawk Annu Rani pawh Nilainiah talbuaiin, tun season-a a thlawh chhiatber dawttu (57.05m) avangin qualification round-ah a tla a, Group A lamah 11-na niin, a pumpuiah 19-na a ni.
Group B qualification round-a parukna a nih hnu overall-a 12-na luah pha Aldrin-a hi India mipa long jumper zinga world championship-a final round thleng thei pahnihna niin, Sreeshankar chuan United States-a 2022 World Championships nghah a nih tum khan final round hi lutin pasarihna dinhmun a lo luah ve tawh a ni.
A chunga tarlan tawh angin, kum 24-a upa Sreeshankar hian vawithum a zuanah 7.74m, 7.66m leh 6.70m a puitlin a, Group A qualification round-ah 12-na ni pha chauhin, overall-ah 22-na a ni daih a, season kal laia a chetchhiatber hun hmang chungin final a thleng zo lo.
Nilaini Indian camp-a chanchin tha lo dang chu final thleng zo loa 3000m steeplechaser Avinash Sable hlawhchham kha a ni.
World Championships bul tan ni Pathianni khan national record holder 3000m steeplechaser Sable chuj heat race-ah pasarihna niin final round a thleng zo lo a; chutih laiin Indian dang pathumin men’s 20km race walk final an lut zo lo a; athlete la naupang tak Shaili Singh pawhin women’s long jump final a inpal thleng zo lo ve bawk.
Ajay Kumar Saroj chuan men’s 1500m heats-ah a personal best (minute thum leh second 38.24) hlenchhuak mah se semi-final a lut zo lo a; men’s triple jump lamah Indian pathum – Praveen Chi-thravel, Eldhose Paul leh Abdulla Aboobacker-te pawhin final round an ban thleng zo lo bawk.
Pathianni vek khan Santhosh Kumar Tamila-rasan (400m hurdles heat race) leh Sarvesh Anil Kushare (high jump qualifi-cation round)-te an tla fel.
Thawhlehniah na-tional record holder 100m hurdler Jyothi Yarraji chuan semi-final a thleng zo lo ve bawk a, Budapest-a a hun hman (13.05 seconds) chu a national record (12.78s) pawh pha lo a ni.
Rin loh taka discus gold latu Tausaga
Hungary ram National Athletics Centre-a World Athletics Championships kal lai thleng thlawhah Thawhlehni khan beisei loh result khawvelin a thlirliam a, American nula Laulauga Tausaga chuan women’s discus throw final-ah a chipui leh rin kai zawk Valarie Allman hmakhalhin gold medal a awrh.
World finals hnuhnung pahniha thlawh tawi ber ve ve lo ni tawh Tausaga hian a vawinga thawlhah metre 69.49 a thlawh thleng a, supporter-te lawm a hlawh ngang mai.
Result dang
Kum 31 mi ni tawh Italian Olympic champion Gianmarco Tamberi chuan world championship men’s high jump final-ah young American JuVaughn Harrison hmakhalhin gold a awrh a; Tamberi hi three-time world champion Mutaz Barshim of Qatar nena Olympic title inchansem kan tih kha a ni.
Kum 24-a upa Harrison chuan silver awrhin a senior global medal hmasaber a thawkchhuak ve bawk.
Women’s 1500m final-ah Kenyan middle-distance superstar Faith Kipyegon chuan a vawithumna atan 1500m world gold a awrh a, world 1,500 metres gold medal a hat-trick ta der mai!
Double Olympic champion Kipyegon hi tunah kum 29 mi niin, Budapest hi World Championships a hmachhawn tum rukn ani tawhin, kum 2013-a a debut hnu khan gold pathum leh silver pahnih hawn tawhin, a bul tan kum khan pangana a ni.
Ethiopian kum 21 mi Diribe Welteji chuan silver awrhin, Sifan Hassan of the Netherlands bronze medal dawngtu a ni.
Morocco mi El Bakkali chuan 3,000m steeple-chase world title a kawl lai a humhim a; tun kha Olympic gold medallist Bakkali-a’n a zawna men’s 3,000 metres steeplechase world championship title tum hnih a lakna a ni nghe nghe.
World record holder leh Olympic silver medallist ni bawk Lamecha Girma of Ethiopia chuan silver medal dawngin, Kenyan Abraham Kibiwot kutah bronze a lut ve thung.