Lallunghnema
Charity Lodge
Cont: 9862288182
Consumer Huang min lo chhiarsaktute leh Consumer zawng zawngte Consumer Day pualin chibai ka buk a che u.
Kumin Consumer Day 15 March hi Pathianni-ah a tla (thleng) tlat mai a. Chuvangin March ni 17 khan FCS&CA huaihawta Minister zahawm tak Pu B. Lalchhanzova hova hman a ni a. Mi hrang hrang hnen atangin thu sawi ngaihthlak a ni a. Kei pawhin thu ka sawi vein Centre For Consumer Education hmalakna te chu ka tar lang deuh ber a. Hei bakah hian nu pakhat, a thil leia harsatna a neih chinfelsak a nih dan ka sawi chhuah chuan ngaithlatute beng a verh khawpin ka hria a ni.
World Consumer Rights Day hi kan lawm zing ta malh malh hle a. Kan hlawk pui meuh em tih erawh ka ngaihtuah fo thin a ni. Consumer-te hi hrilh hriat ngai kan ni. Consumer nih inhre lo, mahni dikna leh chanvo pawh hre lo, nêksâwr leh nêk chêp nih pawh inhre lo hi kan ni a. Thil leitu zingah Consumer an nih anga an dikna au chhuah pui nachâng pawh hre lo sang tam tak an awm mek a ni a. Pawisa neiha lei ve mai, neih lohva lei lo mai. Duhzawng leh châk apiang lei ringawt mi kan ni a. Chinese ho chuan thil an lei hmâin vawi thum an inngaihtuah hmasa phawt thin, an ti. Bungrua tha leh tha lo, thianghlim leh thianghlim lo zir hmasa lova lei ve mai kan ni a. Hetiang thil chin tha lo hi kan bansan a ngai tawh! Chuvangin keini Consumer-te hian kan ‘RIGHT’ hriat chian hi tih mâkmawh a ni a. Sapho thufing anga look before you leap tih hi thinlung lehkha pheka hawrawppuia ziak kan vawn a ngai a ni. Fimkhur, uluk nun hi a pawimawh em em!
Kan ‘RIGHT’ kan hriat loh avang hian kan tuar reng a, mahse a mawl zualte chuan an tuar tih reng an hre si lo! A nih dan tur ve rengah an ngai a, hrehawm tih nachâng pawh an hre lo! Tunah hian Consumer Organisation leh Activist-te hmalâkna zarah consumer awareness zirtirna leh inhrilh hriatna a lo awm chho zel a. Kan Dikna leh Kan Chanvo te chu kan hre ve ta a ni. Dawrkai leh Sumdawngte pawh an lo fing var chho ve zel a. Tunah chuan, kan ziaawm chho ta viau mai. Hei hi Sawrkar leh Activist te Consumer Organization-te thawh rah liau liau a ni. Heng department-a thawktute leh mi thahnemngaite hnenah hian lawmthu sawi consumer-te hian kan bâ a ni.
A hma lama kan sawi ang hian kum tinin khawvel pumah World Consumer Rights Day hi hman a ni thin a. He Ni hi Consumer Right chi hrang hrang inzirtirna leh inhrilh hriatna (awareness) atan hman a ni thin. Thil lei leh hralh, him- dam(safe) leh sumdawnna thianghlim leh fel fai (efficient&fair trading) inhrilhna hun atan hman thin a ni bawk. Bazar hmuna Consumer-te dinhmun pawimawhzia te, Dikna leh Chanvo, an neih te venhimsak leh an hriatna tizauva tihchak hi ram chhung economy chawikanna atan hmanraw tul tak a nihziate inzirtir tam a ngai hle a ni. Corruption pawh kan do thei ngei bawk ang.
Kan sawi fo, kan sawi leh thin ang. World Consumer Rights Day hman a lo nihna chhan hi US President John F.Kenedya’n US Congress-ah Marchni 15, 1962 khan Consumer Right chungchang a puang a. Hemi tum hian Consumer Right pawimawh tak tak pali a puang chhuak nghal a ni. Chungte chu :
(1) The Right to safety
(2) The Right to be informed
(3) The Right to choose
(4) The Right to be heard
Heng, US President puan chhuah tâk Consumer fundamental Right-te hian khawvel pumpui a fan chhuak hneh hle mai a. Ram hrang hrangte chuan Consumer Right pawimawhzia hi an lo hriat phah ta a. Ram tam zawkah te chuan Consumer Movement pawh a chak chho ta zel a. India ramah pawh Consumer Movement a lian chho zel a, Pawl hian tak tak a lo ding mek zel a. Mizoramah pawh hian mipui nawlpui pawhin Consumer nihna leh a tobulte chu kan lo man ve ta mêk zel a ni. Mizoram economy sawi nghingtu pawh Consumer Right hi a ni chho mek ta zel a nih hi! Consumer-te tangrual zel ang u.
Kum 2026 Consumer Day Thupui Safe Products, Confident Consumers tih hi Consumer International thlan chhuah a ni a. Mizo tawngin dah dawn ila, Bungraw himdam, Mahni inring tâwk Consumer kan ti thei âwm e. Thupui pawimawh tak a ni. Thil siam, a tak awm lo, a lem ringawt a awm thei. Tam tham tak hmuh tur a awm. Consumer-te taksa leh nunna tana hlauhawm, hriselna tichhiaa nunna titawi thei thil zawrh tam tak hmuh tur a awm thin a ni. Ei leh in tur thianghlim tihching pen te, damdawi hlauhawm leh hriselna atana pawi thei te, electronics, toys, cosmetics leh online service thlenga thil dik lo zawrh leh service pek hi a awm thin a ni. Bazar hmuna i kal hunah phei chuan heng mihring nunna leh taksa tana hlauhawm tak bawlhhlawh tak tak, zawrh chhuah i hmu ngei ang. Mahse, dawrkai tam tak chuan an hralh hreh lova, sum an hmuh dawn phawt chuan heng thil tha lo, hlauhawm zawrh hi an tîm ngai lova, an inthlahrung ngai hek lo.
Heng thil dik lo zawrh leh hralh te, service tha lo inleisakte hi tibo tur chuan a huhova hmâ kan lâk a ngai a ni. Sumdawng dawrkaite pawh inen fiah rawh se. Consumer-te leh Sawrkar thawhhona a ngai.
Confident Consumers tih hi sawi tam a ngai hle mai. Consumer-te (thil leitu leh service hmanga leitu) hian an lo hriat hnu pawh hian fuih phura tih chak an la mamawh fo mai! Hengte hi an tlachham mek a ni: Huaisenna, Tawrh peihna, Chhelna, Dawhtheihna, Pawisa hlutna hriat chian, Insumtheihna te hi. Heng hi nei ngat se, Confident Consumer an lo ni thei ang. Mahni inrin tâwkna an tlâkchham chhung chuan consumer vanduai an la ni tihna a ni. Centre For Consumer Education thupui chu Knowledge is Power tih a ni a. Chhiar tam, hriat tam, zir tam chu thil tihtheihna a ni. Hre lo chu mi chu a huaisen thei lo. A chak thei hek lo. Tlan chhiat chu an tih tur a ni ringawt.
Consumer chak, tha, mahni inring tawk, nih hi a theih a. ‘I tum chuan i thei! Jago Grahak Jago! Wake up Consumer! Consumer harh la, tho ta che !
Kâr lehah kan ti ti ho leh dawn nia!