World Taekwondo Award sem a ni

World Taekwondo Award sem a ni
Karliamta mai khan Mizo pali telna khawvel pum huap taekwondo inelna lian World Poomsae Championship chuan Hong Kong khawpuiah khelh zawh niin, zan lamah World Taekwondo 2024 Gala Awards huaihawt nghal niin, taekwondo huanga chawimawina ngaihhlut ber berte semchhuah a ni.
He hun hi World Taekwondo president Chungwon Choue leh secretary general Jeongkang Seo bakah mi pawimawh tak takin an hmanpui.
World Taekwondo hian December 2014 khan Querétaro, Mexico-ah Gala Awards hi a tlangzarh tan a; kumina chawimawina dawngtute hi World Taekwondo Technical Commission-in a rawt angin Paris Olympic 2024 leh inelna dang atanga thlan an ni.
Female Athlete of the Year award hi Paris Olympic -67kg huanga gold medal latu Hungarian kum 18 mi lek hnenah hlan a ni.
Paris Olympic Games 2024 vek -68kg huanga gold medal dawngtu Uzbekistan mi Ulugbek Rashitov chuan Male Athlete of the Year award a dawng ve thung.
Female Para Taekwondo Athlete of the Year dawngtu chu Peru nula Leonor Angélica Espinoza Carranza a ni.
Azerbaijan tlangval Imamaddin Khalilov chuan Male Para Taekwondo Athlete of the Year award a dawng ve bawk.
Gala Awards-a chawimawina dawngtu dang chu men’s -58kg Olympic champion Taejoon Park of Korea niin, ani hian Kick of the Year chawimawina a dawng.
Tunisia team head coach Yesbul Sultanov chu Coach of the Year chawimawina hlan a ni.
Great Britain mi Andrew Deer chu Para Taekwondo Coach of the Year atan thlan a ni bawk.
Egypt mi May Mohamed Aly El Sayed kutah Olympic Referee of the Year award a lut a; Spaniard Paula Remirez Ruiz chu Paralympic Referee of the Year hmasaber atan thlan a ni bawk.
MNA of the Year award chu USA Taekwondo hnenah hlan a ni.