Chinese hruaitu, Xi Jinping-a chuan President Donald Trump-a nena ni hnih awh tur summit an neih tanah sumdawnna lama inbiaknaah hma a sawn thu a hrilh a, Taiwan chungchanga inrem lohnain inlaichinna chu kawng hlauhawm takah a hruai thei a, buaina pawh a thlen thei niin a hrilh bawk.
Chinese hruaitu hian Taiwan chungchanga thu a sawi hi inbiakna lian tak, a hmaa a la awm ngai lova a sawi a ni a, Trump-a chuan ‘inbiakna lian ber’ a nih a rinawm thu a sawi.
Tun hi Iran indona avanga Trump-a pawmna rating a tlahniam mek laiin kum 10 dawn hnua US president-in a kalphung leh eibara a khingpui ber ram a tlawh hmasak ber a ni.
Beijing-a Great Hall of the People ropui takah chawimawina leh naupang tam takin phur taka pangpar leh flag kenga an lo lawm hnuah hruaitu pahnihte hi Ningani khan darkar hnih chuang an inbia a, Trump-a hian Xi-a chu a fak hle bawk.
“Hruaitu ropui tak i ni a, a chang chuan miten ka sawi hi an duh lo va; mahse, ka sawi zel thin,” tiin Trump-a a hian bul a tan a. “Hei hi summit lian ber a ni mai thei tih sawitu an awm a ni,” a ti bawk.
A hnuah Xi-a chuan Nilaini khan South Korea-a US leh Chinese economic leh trade team-te inbiakna chu ‘a inbuk tawkin a tha lam’ a nih thu a sawi tih an ram foreign ministry-in thu a chhuahah tar lan a ni.
Inbiakna hian nikum October thlaa khawvel economy lian ber pahnih inkara insumdawn tawnnaa inrin tawnna chak lo tak an siam vawng tur leh nakin zela sumdawnna leh investment-a inthlawpna tur siam a tum a nih thu inbiakna hriate chuan an sawi.
Xi-a hian China-in a awp, mipui rorelna hmang thliarkar, US-in ralthuama a puih, Taiwan chungchang pawh a sawi chhuak.
Chinese hruaitu hian Trump-a hnenah Taiwan chu an hmachhawn tur pawimawh ber a nih thu leh a enkawl that loh chuan US-China inkar zawng zawng chu dinhmun hlauhawm takah a hruai lut thei a, ram hrang hrangte chu an inhnial emaw, buainaah emaw pawh an luhpui thei tiin an inbiaknaah a sawi tih Beijing chuan a tar lang.
Trump-a hian a hnua chanchinbu mi pakhatin UNESCO World Heritage Site Temple of Heaven-a thlalak a lak laiin Taiwan chungchang an sawi dun em tih a zawhna chu a chhang lo.
Hruaitute hian sumdawnna leh agriculture lama thawhhona tihpun an remti a, Middle East, Ukraine leh Korean peninsula-a thil awm dan chungchangah ngaihdan an inhrilh niin China thuchhuah chuan tar lang.
Trump-a leh Xi-a hi a hnuah state banquet-ah an tel dawn a, Zirtawpni hian chawchhun an fak dun leh bawk ang.
Xi-a leh Trump-a inbia, Taiwan-in an inkar tichhe thei
