Spain forward inhliam Lamine Yamal chuan tun season-ah Barcelona tan inlan thei dawn tawh lo mah se June thla atanga khelh tan tur World Cup-ah erawh a inlan hman an ring chin phawt.
Kar laihawl Nilaini zan inkhel pakhata si khat faia Celta Vigo an hnehna goal awmchhun penalty atanga a chhuihluh hnuah Spanish rawlthar kum 18 mi hian a chawn vei lam tha a tina a; minute 40-a goal a thun hnu lawkah medical staff-te puihnain khelmual a chhuahsan a; a hliam endik a nih hnuah a tan season kal lai a tawp fel tih nemngheh a ni.
Ningani khan a khelhna club chuan thuchhuah siamin, league season kal laia Yamal-a inkhelh theih tawh loh tur thu sawiin, khawng taka enkawlna kalpui a nih tur thu leh World Cup khelh tan huna inpeihchhuahtir hman hram an tum thu a sawi.
Yamal pawhin Instagram lamah a dinhmun tarchhuak ve nghalin, “La khelh chhunzawm ka duh em em laiin he hliam avang hian loh theih loha khelmual ka chhuahsan a ngai a, a nat dan hi ka sawifiah mai thei lo.
“Ka team-mate ruala league inbeihna kal mek ka chhunzawm thei lo tur hi na ka ti a, team-in min mamawh laia ka pui thei lo tur mawlh hi na ka ti; mahse, ka ring tawk a, game tinah an theihna zawng zawng an hlan zel dawn tih ka chiang a ni.
“Pawn lamah awm ta rih mah ila team thlawp tlat tur te, hmalam pan zela tura fuih tur leh tiphur turin ka awm reng dawn. Hei hi a tawpna a ni lo a, chawlhlawkna mai a ni. Tuihal zawk leh khawng zawkin ka lo kirleh dawn a, season thar hi ka tan hun tha zawk a ni ngei ang,” a ti.
La Liga reigning champion Barcelona hian game ruk khelh tur la awmah point kuain anmahni hnaihbertu Real Madrid an thlau mek a, May ni 10 khian El Clasico-ah an intum dawn a, hei hi team pahnih tawp dan tur hriltu pawimawh pakhat a nih a rinawm.
Ti chuan, club lamah Yamal-a season tawp fel tawh mah se Spain tan World Cup khelh ngei a tum mek a, June ni 15 khian Group H bul an tannaa Cape Verde an sut hunah khelmual luh hman inbeiseiin enkawlna a dawng kal mek a; group stage match dangah Spain hian Saudi Arabia (21 June) leh Uruguay (27 June) an su zui leh ang.
Yamal-a season a zo World Cup erawh an beiseipui
